Air New Zealand ensagèt dissabte una nòva rota, amb d’avions regulars, entre la vila de Christchurch e Antartida. Los vòls s’adreiçan als nombroses cercaires que trabalhan temporàriament pendent la sason en las basas scientificas antarticas, que fins ara i arribavan e ne sortissián amb de vaissèls o amb d’avions militars. La companhiá aeriana neozelandesa emplega un Boeing 767-300 qu’atèrra sus una pista glaçada a la Plataforma de Glaç de Ross.
 
Los pòrtavoses de la companhiá asseguran qu’a pas calgut modificar l’aparelh pr’amor que l’aeropòrt Pegasus, en Antartida, a las meteissas caracteristicas qu’una pista normala cobèrta de nèu, coma es lo cas plan sovent de l’aeropòrt de Tòquio, un dels mai concorreguts del Mond. Per percórrer las doas mila milas nauticas de distància, cal cinc oras.
 
Air New Zealand avertís que los vòls son pas comercials, e per ara son pas encara dobèrts al nombre creissent de toristas que vesitan lo continent glaçat, aperaquí trenta cinc mila solament l’estiu passat.
 
La companhiá aviá pas jamai aterrat abans en Artantida, mas en 1977 comencèt d’organizar de vòls scenics sul continent. Ça que la, aquelas excursions aerianas s’arturèron en 1979 après que lo vòl 901 truquèt lo Mont Erebus e que moriguèron las 257 personas que i viatjavan.