Dins qualques jorns, Eric Andrieu, aurà son sèti al Parlament Europèu en remplaçant lo tolosan Kader Arif, qu'intra far partida del govèrn francés de J.M. Ayrault.

 

Eric Andrieu a la reputacion d'èsser un tipe eficaç e onèste. Parla occitan quitament dins los acamps politics e uèi es vengut l'espèr d'un pòble, qu'a besonh d'un ambassador de la revendicacion occitana al Parlament Europèu.

 

Nascut a las Corbièras foguèt president del CIRDOC, la mediatèca occitana de Besièrs. Militant al PS d'Aude es totjorn estat fòrça restacat a la cultura occitana. La siá oposicion a las politicas de Frêche l'empachèt pas de trabalhar en politica. Es estat cònsol de Vilaroja de Termenés (Corbièras) dempuèi 1995.

 

En 1990 fondèt lo Districte de desvolopament del massís de Motomet, lo primièr discrite de desvolpament rural dins l'Estat francés, e ne foguèt president fins l'an 2000. Aquel districte èra la prefiguracion de la Comunitat de Comunas de Motomet, cabecièra en servicis socials (escòla, albergament per vielhs, centre de secors, plan viticòla, reorganizacion fonzièra, installacion d'elevaires, ponches multi-servicis, centre d'iniciativas a l'environament, gropament d'Internet, eca.)

Al vidèo çai-jonch, podètz veire l'entrevista que Jacme Delmas e Cedric Rousseu faguèron a Eric Andrieu aprèp lo debat de dissabte 30 de mai 2009 en çò de País Nòstre.