Aquesta dimenjada, se tenián las finalas de Superliga e d’NRL. Dissabte, sus l’estadi d’Old Trafford (Manchester), Wigan afrontava los Lops de Warrington. Aprèp una penalitat de Wigan, los Lops sortiguèron los cròcs per menar 16-2 amb la concretizacion de tres ensags entre la vintena e la vint e cinquena minuta. Mas, aprèp un arrèst en seguida de la nafradura d’un jogaire de Warrington, los Combatents marcavan just abans la pausa: 16-8. Dins lo segond temps, los 67 000 espectators assistiguèron al revelh de Wigan que, doçamenton, cadena aprèp cadena, sos jogaires prenguèron lo pas suls Lops que poguèron res contra los quatre ensags dels roge e blanc. Escartat per una brava passa sautada, l’alièr Richard marquèt en marchant lo darrièr ensag. Sus la marca de 30-16, Wigan averava non solament lo trofèu de la Superliga mas realizava a l’encòp lo doblat amb la Cup.
 
Dimenge, a l’ANZ Stadium de Sydney, davant 82 000 espectators, las Aglas de Manly dobrissián la marca per un ensag de Taufua. Mas, abans la pausa, los Pols-Roosters prenián l’avantatge per un ensag de Tupou (transformacion de Mamoney) e una penalitat: 8-6. A la represa, las Aglas marcavan dos còps: un ensag de penalizacion e un del centre Matai. Amb las transformacions, Manly menava 16-6. Mas los Pols volián pas plegar atal e prenián l’avantatge 20-18 a l’ora de jòc mercé a dos ensags transformats. Sul segond, Sonny Bill Williams faguèt un brave traucàs dins la defensa de Manly. Los Pols confortèron lor victòria mercé a un ensag de Jennigs (73a).
 
Amb las transformacions de Maloney, es sus una marca de 26-18 que los Pols-Roosters s’emparavan del trofèu, amb lo Trent Robinson (entraïnaire dels Dracs l’an passat e inconegut en NRL) a la manòbra. Es dins aquesta esquipa campiona qu’a signat lo Drac lesinhanés Romièg Casty! Los Pols-Roosters son vestits de blau, blanc e roge en sovenir dels soldats australians venguts en França per la Granda Guèrra e tanben en remembre de la famosa virada de 1951!
 
En campionat d’Elèit, dissabte de vèspre, los Dragonets se devián faire perdonar la desfacha fàcia a Limós. Los espectators foguèron pas deçauputs del viatge que los catalans passèron un 56-12 sens apèl a Avinhon. En serada, la partida foguèt de tria entre l’AS Carcassona e lo Tolosa Olimpic. Dins lo primièr temps, contra lo vent, los Canaris dominèron territorialament, mas se deguèron contentar d’un 4-0 a la pausa (doas penalitats de Maxime Gressèque). A la represa, lo pilar Tyrone Pau s’enfonzava dins una defensa tolzana que cercava captòrtas dins la pelena e l’arrièr Guiraud puntava l’ensag. Tolosa replicava sul pic per un ensag d’Aaron Wood mas Bastian Escamillàs al tèrme d’un movement collectiu marcava. Gressèque ajustava dos tombats, e Tolosa trapava lo trauc solament sus la còrna: 18-10 pels locals. Dimenge, calguèt a Limós mièg temps per metre son jòc en plaça e ganhar aisidament fàcia a Palau: 48-8 alara que Lesinhan esperava l’ora de jòc per assucar una valerosa e dinamica esquipa de Vilanuèva: 33-24. Al Molin, las causas retombèron solament a l’ora del jòc quand Lesinhan prenguèt l’avantatge per ganhar fin finala 34-26 contra Vilanuèva. A Palau, Limós (que demòra sol sens una sola desfacha) s’envolèt dins lo segond temps: 48-8.
 
Passem al programa de la dimenjada qu’arriba: dissabte, Avinhon anirà a Tolosa alara que Palau reçauprà los Dragonets, Carcassona serà dimenge cò de sa bèstia negra Vilanuèva e Limós ensajarà d’emportar son primièr dèrbi de la sason fàcia a Lesinhan. En vista de la Copa del Monde, de senhalar la difusion quotidiana (tre aqueste diluns 7 d’octobre) d’una cronica en occitan sus Ràdio-Lenga d’Òc-Narbona e Ràdio Lengadòc-Erau “Sul camin d’Old Trafford”.
 
 
 
 
Alan Roch