Actualitats
Brasil: de grandas protèstas dels professors publics, en seguida de las mobilizacions indigènas
Après una setmana de grandas protèstas indigènas, Brasil ven de viure una setmana de mobilizacions dels professors publics, que son en cauma dempuèi lo mes passat per reclamar un melhorament dels salaris e de las condicions de trabalh.
La setmana passada, la polícia ataquèt desmesuradament de nombroses manifestants pacifics, çò que provoquèt que mai de mond jonguèsson la protèsta dels professors, qu’amassèt mai de 20 000 personas solament a Rio de Janeiro. Lo resultat foguèt de violéncias espectaclosas diluns passat pendent las protèstas de Rio de Janeiro e de São Paulo; ailà, lo mond que protestavan lancèron de pirotecnia e mai de coctèls Molotov als edificis municipals e a la polícia, que respondèt amb de gases.
Los professors de Rio de Janeiro fa de meses que demandan de melhoraments, e la municipalitat respondèt la setmana passada amb un ajustament de 15% dels salaris de totes los professionals de l’educacion. Ça que la, lo sindicat dels ensenhaires planguèt qu’òm l’aguèsse pas escotat e qu’òm aguèsse redigit una lei sens son consentiment e sens lo dels partits de l’oposicion. Los ensenhairers vòlon aver una tresena partida del temps per preparar las leiçons, e demandan que los directors dels centres publics sián elegits democraticament. Planhon tanplan la brutalitat policièra.
Setmana de mobilizacions indigènas
Aquelas protèstas s’apondon a la Setmana de Mobilizacion Nacionala Indigèna, qu’es lo primièr còp que se fa dins tot Brasil una campanha de sosten als dreches politics dels indigènas, del nòrd al sud.
Atal, las mobilizacions dels indigènas, las an jongut de movements ciutadans, païsans e quilombòlas (d’installacions fondadas per d’afrobrasilièrs).
Las manifestacions son estadas nombrosas, mai que mai a Sampa o a Brasília ont son estadas quitament istoricas.
Per lo primièr còp amassa, los ocupats “an ocupat” de sedenças d’organismes estatals responsables de la desforestacion o de l’inondacion de lors tèrras, e mai an ocupat de fazendas, aquelas grandas proprietats agricòlas que se son installadas sus lors païses après los aver fòrabandits a eles.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Los colonialistas ee los capitalistas, totes a la mar, que los chapen las làmias !
Minoritat contra l'empèri,
indians de totas las colors,
descolonisarèm la tèrra.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari