Dimars 8 d’octobre, eth cinèma Eth Regent qu’organizava, en partenariat dab Eth Ostau Comengés, era projeccion de dus documentaris produits per aquera associacion qu’a coma objectiu de cuélher e de transméter era cultura gascona pirenenca. E, dab 190 espectators presents, que podem díguer que huc ua brava escajuda!
 
Era serada que comencèc pera projeccion deth filme Tot un Hormatge, que conda ce quin eths majoraus de Varossa haián d’autis còps eth hormatge en eths cortaus e ce quin aquera societat montanhòla virava ath torn dera produccion d’aqueth hormatge.
 
Eth segond filme projectat qu’èra Eth Vin de Casa. Se Comenge non é cap especialament conegut pera qualitat de son vin, bèth temps a, guaireben cada maison qu’aviá sa(s) vinha(s). Aué, que n’i a plan que son arrigadas mès que n’i demòra encara quauqu’ua, gràcias a ua punhada de passionats. A travèrs d’aqueth filme, òm qu’apreng eth çò qu’é un hautin, òm que descobrish eth nom deras varietats localas, òm que ved ce quin se cau ocupar dera vinha tota era annada, en tot demorar eras vrenhas e eth moment de colar aqueth “petiu vin”.
 
Aquera dobla projeccion que huc animada per Joan-Pau Ferré e Renaud Lassalle, arresponsables deth Ostau Comengés e realizaires deths documentaris dab un escambi pendent eth quau uas quantas personas prengueren era paraula, era major part deth temps en occitan. Era serada que s’acabèc ena convivialitat, en tot tastar eth hormatge de Varossa e en tot béver un còp de vin de casa.
 
Qu’é possible de crompà’s aqueris DVD (ath prètz unitari de 15 èuros + 2,70 èuros de pòrt, s’ac cau) en tot contactar Eth Ostau Comengés per telefòn (+33 [0]5 61 04 49 24) o per Internet.
 
 
 
 
Joan-Pau Ferré