Totes los partits politics del Congrès dels deputats espanhòl, levat lo Partit Popular (PP), refusèron ièr la lei de reforma educativa de l’estat espanhòl (LOMCE segon sa sigla en castelhan). La lei prepausada pel ministre José Ignacio Wert es la setena dempuèi la dictatura e s’impausarà dins las escòlas per la majoritat absoluda del PP. De son costat, Wert diguèt que li auriá agradat d’aver mai de sostens a sa lei educativa, mas “es pas estat possible per la manca de volontat e de dialòg que s’es demostrada”.
 
Totes los partits, levat lo PP e UPYD, an remarcat que s’agís d’un retorn a la politica educativa de la dictatura de Franco. De fach, en julhet passat signèron ja un acòrdi d’engatjament per abolir aquela la LOMCE quora aurián la capacitat parlamentària d’o far. De son costat, lo govèrn de Catalonha va contestar aquela lei al Tribunal Constitucional.
 
La lei, qu’ara deu passar lo vòte del Senat, establís que l’espanhòl es la sola lenga veïculara dins tot l’estat, crèa d’examens d’avaloracion centralizats a Madrid en fin de primària e segondària e redusís lo poder de las associacions de parents d’escolans.
 
Las matèrias restacadas a las lengas dichas cooficialas (occitan, catalan, galèc e basco) se considèran de matèrias d’especializacion opcionalas. Lo PP argumenta que sa lei vòl “esclarzir que lo castelhan pòt pas èsser expulsat ni mesestimat dins lo sistèma educatiu”. Mas se s’aplica aquela lei, perdrem l’immersion en aranés dins las escòlas d’Aran.
 
Mai d’un collectiu de professors an manifestat qu’obesiràn pas a aquela lei. Pasmens la Generalitat de Catalonha n’assumirà la desobesissença per evitar d’insomissions d’ensenhaires e per portar pas la tension dins las escòlas. Ça que la, aquela lei s’aplicarà en setembre de 2014, e “fins en setembre se pòdon passar fòrça causas”, çò diguèt la conselhièra de l’ensenhament de Catalonha, Irene Rigau.