Era Associacion de Criadors de Oelhes de Raça Aranesa (ACORA), er Ajuntament de Vielha e Mijaran e eth Conselh Generau d’Aran, qu'organizen aguesta jornada en encastre dera hèira “Es productes dera nòsta tèrra”. Er eveniment que prepause diuèrses activitats entà tota era familha ath long de tot eth dia, en tot sajar que d’ua manèra practica e dinamica autant es grani coma es petiti se distrèiguen e conèishen un sinhau mielhor era oelha aranesa e as productors e artesans dera Val d’Aran.

 

Era raça aranesa qu'ei en perilh d’extincion, damb un cens de lèu 3 000 animaus distribuïts en 36 ramaderies, e er objectiu fonamentau d’ACORA n'ei era sua conservacion e promocion. Per çò qu'ei des sues caracteristiques particulares, era Raça de Oelha Aranesa se caracterize per èster grana, de proporcions alongades e, ath delà, ambdús sèxes presenten bures. Vist qu’es ramadèrs d’ACORA vòlen arrecuperar es varietats mès antigues en çò que tanh ara capa, s’admeten sies varietats de color: blanca, nera, bereta, mascarda, capiròia e oelhinera.

 

 

Conselh Generau d'Aran