L’associacion d’amistat francoargeriana, France-El Djazaïr, a fach sa denóncia contra un policièr municipal d’Alès per “injúrias e incitacion a l’asirança xenofòba e islamofòba”. Segon d’informacions de Midi Libre, lo policièr aviá publicat sus son perfil Facebook un fotomontatge ont se vesiá lo drapèl d’Argeria e la mençon “I hate Algérie” (“Asiri Argeria”), estacats a l’imatge d’un òme que s’eissugava lo darrièr amb lo meteis drapèl.
 
Lo president de l’associacion planhenta, Bernard Descamps, explicava als mèdias qu’aquela publicacion aviá levat fòrça emocion a Alès, “una vila ont i a una fòrta preséncia de personas d’origina argeriana perque foguèt lo còr del bacin menièr”. De son costat, lo foncionari admetiá d’aver comés una “gròssa cofa”.
 
Lo primièr cònsol d’Alès, Max Roustan, presentèt sas excusas a Adballah Zekri, president de l’Observatòri Estatal sus l’Islamofobia. “Ai decidit, après aver dich ma reprobacion per de tals actes, d’infligir una sancion administrativa exemplara a aqueste agent, que serà versada a son dorsièr per qu’aquò se pòsca pas reprodusir. L’agent m’expliquèt qu’o planhiá fòrça. Vos presenti tanben a totas las personas chocadas per aqueste afar, en nom de la collectivitat, mas sincèras excusas e tanben las de l’agent concernit”
 
Lo conselhièr municipal del Partit Socialista, Benjamin Mathéaud, precisèt sus son sit Internet, que l’autor d’aqueles imatges es “lo director de la polícia municipala”. Mathéaud, que qualifica que los imatges e los comentaris son “de natura infamanta e inutilament ofensanta”, demandèt al cònsol Roustan la dobertura d’una enquèsta e la presa de sancions.
 
L’associacion apond qu’aquelas accions “s’inscrivon dins un clima xenofòb favorizat per las politicas d’austeritat e atisat per l’extrèma drecha”.