Qualques milièrs de personas manifestèron dissabte a Barcelona per l’unitat d’Espanha, en amassant mens de mond que çò que prevesián. Se debanèron tanben de concentracions faissistas contra l’independéncia de Catalonha. Mas tanben, invèrsament, i aguèt de manifestacions de refús del faissisme e contra lo Jorn de l’Ispanitat.

Malgrat totas las cridas fachas pel Partit Popular (PP) e Ciutadans (C’s), a aquel acamp convocat dissabte per la plataforma Som Catalunya-Somos España, l’unionisme espanholista amassèt pas mai de mond que çò qu’aviá ja amassat arunan a Barcelona. Segon la polícia i aviá 30 000 personas, segon lo govèrn espanhòl 105 000, mentre que segon los organizaires èran 160 000. E mai se se vegèt de saludacions faissistas e de bandièras franquistas, l’acamp se debanèt pacificament.
 
La manifestacion se passava a l’escasença del Jorn de l’Ispanitat, e la tòca dels organizaires èra de metre en evidéncia qu’en Catalonha i a tanben de ciutadans que vòlon pas l’independéncia del país. Manifestèron los partits unionistas radicals, PP e C’s, amb lo movement franquista de la Falange Espanhòla de las JONS e lo grop neonazi Casal Tramuntana, qu’anava acompanhat d’un representant grèc de Chrysi Avgi (Alba Daurada).
 
La presidenta de la seccion catalana del PP, Alícia Sánchez-Camacho, afirmèt que “l’imatge de la via independentista es pas lo sol imatge de Catalonha”, en referéncia a la Via Catalana de l’11 de setembre passat, e mai se l’acamp unionista es plan luènh de l’1,6 milion de personas que manifestèron per l’independéncia.
 
 
Petita concentracion faissista
 
De matin, aperaquí 300 individús de grops ultradrechistas marchèron cap al Pargue de Montjuïc, en revendicant l’espanholitat de Catalonha. Demest los manisfestants i aviá qualques unes dels detenguts per aver atacat la delegacion de la Generalitat de Catalonha a Madrid l’11 de setembre passat. De fach, la majoritat d’aqueles manifestants arribèron de Madrid menats en tres autobuses.
 
Los acampats faguèron una ceremònia a la bandièra espanhòla, en lançant de messatges nostalgics de la dictatura franquista e de cridas a la violéncia. “I aurà pas de secession de Catalonha sens sang”, çò diguèt Pedro Peña, guida del partit franquista de l’Aliança Nacionala.
 
 
Responsa antifaissista
 
De manifestacions antifaissistas se debanèron pendent tota la jornada en Barcelona. Aperaquí 400 personas comencèron a 8h del matin a Sants per empedir l’intrada dels faissistas dins aquel quartièr, e contunhèron a miègjorn al centre de Barcelona per manifestar lor refús de l’acamp espanholista.
 
Lo movement antifaissista s’èra mobilizat dempuèi una setmana contra aquelas exibicions d’ultradrecha. Es pr’amor d’aquò que la manifestacion faissista se debanèt luènh de las zònas abitadas.
 
Un milièr de policièrs susvelhèron los faissistas pendent tota la jornada fins que partiguèsson los autobuses. Pr’amor d’aquò se raportèt solament un incident, quand un grop de vesins de Sants tustèron un grop de faissistas mentre que s’èran estancats per beure un còp dins un bar del quartièr. Twitter raportèt tanplan una agression faissista contra una familha d’immigrants.
 
 
Refús de l’ispanitat
 
Fin finala, la jornada s’acabèt a la Plaça de la Mercè, dins una fèsta revendicativa “Contra l’impunitat del faissisme, contra lo genocidi e lo racisme, per la sobeiranetat dels pòbles, per la convivéncia e per la diversitat”. Cal dire que lo 12 d’octòbre l’espanholisme festeja la “descobèrta” d’America, çò que provòca cada an lo refús d’una partida granda de la societat.
 
Un sector de la comunautat latinoamericana, que condemna la colonizacion e lo genocidi, participèt e jonguèt un acte festiu amb de musica e de dichas per fin de refusar aquela jornada, ja que “los faches istorics que commemòra van contra los dreches umans basics”. Tanben participèron de representants dels partits politics Iniciativa per Catalonha-Verds (ICV) e de la Candidatura d’Unitat Populara (CUP).
 
 
A Madrid per l’unitat d’Espanha
 
La monarquia espanhòla centrèt la celebracion del Jorn de l’Ispanitat a Madrid. Après una recepcion e un brinde al palais reial, lo prince Felip presidiguèt un desfilat militar. Èra lo primièr còp que lo prince preniá la plaça de son paire, que contunha d’èsser convalescent après son operacion del maluc.
 
“Uèi es un jorn per celebrar çò que nos unís, per remembrar la nòstra istòria millenària e valorizar tot çò qu’avèm atench amassa”, çò diguèt lo prince a l’ora de convidar las autoritats a brindar pel rei e per Espanha.
 
Participèt tanplan l’èx-president del govèrn espanhòl, José María Aznar, perque la situacion d’Espanha es a l’ora d’ara “d’una gravitat extrèma” segon el.