De centenats de manifestants s’amassèron ièr dins la Plaça Navarreria de Pampalona per evitar la detencion e l’empresonament de Luis Goñi, condemnat a sièis ans de preson pel fach d’aperténer a Segi, una organizacion juvenila basca illegalizada.
 
Goñi èra amagat dempuèi julhet, quand lo Tribunal Suprèm espanhòl ratifiquèt la senténcia de condemnacion, mas fa qualques jorns el difondèt un vidèo en anonciant que repareisseriá publicament ièr a Pampalona.
 
Es pr’amor d’aquò que ièr a miègjorn se debanèt una manifestacion, que s’acabèt sus la Plaça Navarreria, ont los manifestants faguèron un mur uman a l’entorn de Goñi per n’evitar la detencion e l’empresonament. La polícia espanhòla trenquèt la paret umana de matinada e detenguèt lo jove Goñi. (vidèo).
 
Es pas lo primièr còp que la societat basca se mobiliza per una accion similara. Fa qualques meses, de murs populars capitèron d’empedir pendent qualques oras (e qualques jorns) la detencion d’autres joves condemnats per çò meteis.