Bossòst que recuperèc agèr tres pèces d’art, qu’auien estat panades hè catorze ans e qu’es lairons retornèren ar avescat jos sagèth de confession. Er acte oficiau de retorn des pèces se debanèc agèr entàs 16h damb es principaus autoritats politiques e religioses deth país.
 
Eth panatòri se produsic eth 8 de noveme de 1999. Es lairons que s’amaguèren en interior dera glèisa, e un còp barrada que trabalhèren tranquillaments entà préner es pèces e hugir pera pòrta deth darrèr. Catorze ans dempús, que confessèren eth panatòri ar avescat, que ne deu guardar eth sagèth de confession, e que retornèren es pèces.
 
“Se tracte de tres frontaus d’autar, d’estil barròc, datadi en sègle XVIII”, segon çò que raportaue Jèp de Montoya, cap de Cultura e Patrimòni deth Conselh Generau d’Aran. Be s’agís d’un testimoniatge màger dera importància deth trabalh dera husta policromada deth barròc pirenenc.
 
Eth baile de Bossòst, Francisco Rodríguez Miranda, qu’arregraïc eth gèste e se felitèc per aquera "suspresa plasenta", que "contribuís a recuperar eth patrimòni artistic e istoric dera municipalitat". Rodríguez qu’arrebrembèc e qu’arreconeishèc eth pretzhèt de monsen Joan Caseny, rector de Bossòst ena epòca deth panatòri.
 
 
 
 
Ferriòl Macip