Los Estats Units seràn pas en cessacion de pagaments. Un acòrdi in extremis entre los democratas e los republicans permetèt ièr que s’evitèsse una situacion qu’auriá afectat plan negativament l’economia del país, e de rebucada, lo Mond.
 
La Cambra dels Representants aprovèt de levar lo limit del deute fins al 7 de febrièr e de redobrir lo govèrn federal fins al 15 de genièr, après son barrament lo 1r d’octòbre passat. Aital lo Congrès aurà qualque temps per debatre sus las despensas e la reduccion del deficit.
 
Lo Senat votèt en favor, amb 81 vòtes per e 18 contra. Puèi l’acòrdi se portèt a la Cambra dels Representants ont s’aprovèt definitivament. Dijòus que ven los foncionaris tornaràn al trabalh.
 
Lo president estatsunidenc, Barack Obama, diguèt que signariá la lei sul pic, mas soslinhèt que la lucha de partits de las darrièras setmanas a fach que los ciutadans perdèsson fisança en los politicians.
 
Las negociacions entre republicans e democratas per evitar la falhida del sistèma s’èran intensificadas los darrièrs jorns davant la proximitat de la cessacion de pagaments, que se deviá passar ièr, 17 d’octòbre. Las convèrsas son estadas complicadas, mai que mai perque los congressistas republicans ligats al Tea Party volián, en escambi, que s’emendèsse la reforma de la santat, impulsada per Obama, e qu’es ja en vigor.
 
Lo chepic per aquela situacion arribèt al ponch que l’agéncia de qualificacion Fitch aviá menaçat de rebaissar la nòta del deute dels Estats Units. Fitch considerava que lo risc de falhida èra naut pr’amor de l’incertitud que regnava a Washington.