Aqueste dissabte 26, de vèspre, se dobrirà al Millenium de Caerdydd l’edicion 2013 de la Copa del Monde de XIII amb doas partidas de tria: Anglatèrra-Austràlia e Galas-Itàlia.
 
Catòrze esquipas prenon part a la competicion. Son repartidas en doas polas de quatre e doas polas de tres: A: Anglatèrra, Austràlia, Fiji e Irlanda; B: Nòva Zelanda (los campions actuals), Papoa-Nòva Guinèa, Samoa e França; C: Tònga, Escòcia e Itàlia; D: Galas, Estats Units d’America e Illas Cook.
 
Las polas A e B qualifican tres esquipas pels quarts. Las polas C e D qualifican una sola esquipa.
 
Particularitat: las esquipas dels grops C e D rescontran las doas autras de lor grop, mai una partida contra una esquipa de l’autre grop.
 
França entamenarà la competicion tre aqueste dimenge 27 a Hull contra Papoa-Nòva Guinèa abans de reçaupre la Nòva Zelanda lo divendres 1r de novembre a Avinhon e Samoa lo diluns 11 de novembre a Perpinhan. L’objectiu dels Blaus (una formacion quasi exclusivament formada de Dracs catalans o d’èx-Dracs) es la participacion als quarts.
 
Objectiu realista, mas i caldrà metre mai de biais que dins la confrontacion de preparacion perduda contra los Estats Units aqueste divendres 18 a Tolosa (22-18).
 
Las doas mièjas finalas (the big hit) se tendràn lo dissabte 23 de novembre a Wembley. La finala se jogarà lo dissabte 30 de novembre a Manchester.
 
Lo favorit logic de la competicion es, un còp de mai, Austràlia. Anglatèrra e la Nòva Zelanda ensajaràn de li complicar lo prètzfach.
 
 
 
 
Alan Roch
 
_____
 
－ Sit per reservar de plaças per Avinhon e Perpinhan.
－ Lo sit oficial de la Copa del Monde.
－ Difusion: BeInSport retransmetrà un nombre bèl de partidas.
－ Cronica ràdio Sul Camin d’Old Trafford: del diluns al dissabte, sus Ràdio-Lenga d’Òc Narbona (siá entre 7h e 8 h, siá a 10 h; represa a 14 h) e sus Ràdio-Lenga d’Òc Erau (12h50).