De milièrs de manifestants sortiguèron per carrièras dissabte passat en Itàlia e Portugal contra las reduccions budgetàrias e la precarietat del trabalh. En Portugal las marchas foguèron multitudinàrias e pacificas. Per contra en Itàlia la protèsta de Roma s’acabèt per d’incidents grèus e d’afrontaments fòrts amb la polícia. Un grop d’encagolats lancèt de coctèls Molotov contra lo Ministèri de l’Economia, contra l’ambaissada alemanda, contra de sucursalas bancàrias e contra lo sèti de Trenitalia, çò que generèt la responsa de la polícia amb de gases lacrimogèns e s’acabèt amb desenats de ferits e d’agressions dins divèrses endreches de la vila.
 
La manifestacion, amb lo lèma “Contra la precarietat professionala e l’austeritat, organizem nòstra ràbia”, èra convocada per de grops universitaris, d’entitats anarquistas e los collectius contra lo tren de granda velocitat. La marcha aviá tanben lo sosten d’Anonymous, que bloquèt qualques sits web, dont lo del Ministèri de las Infrastructuras e lo del jornal Corriere della Sera.
 
En Portugal per contra, las mobilizacions, convocadas pels sindicats, foguèron pacificas. Los manifestants demandèron la demission del cap del govèrn, Pedro Passos Coelho, e clamèron contra las reduccions de las retiradas e los salaris dels foncionaris.