L’emblèma de l’esquipa de Papoa Nòva-Guinèa es lo kumul, un aucèl de Paradís, que promet l’infèrn als Pols. Per la dobertura de la Copa del Monde de 2000, a París, los Papós ganhèron contra França: 23-20. Las doas formacions foguèron puèi quart de finalistas. De qué ne serà aqueste dimenge 27 d’octobre, al Craven Park d’Hull? A cinc oras del vèspre, serà pas lo moment de s’assetar tranquillon a una taula dins un fautuèlh mofle per beure lo tè un det levat e mordejar de pastissons del cap de las dents: non, serà ora de se sortir los arpions e de pas doblidar lo paradents! França es quatrena al classament internacional e Papoa seisena: se vei que l’escart es pas plan grand.
 
Son los menaires, los carbonièrs e los soldats australians que menèron l’espòrt sus l’illa dins las annadas 1930. Coneguèt un afogament bèl e la Federacion nasquèt en 1949. En 1974, se joguèt contra la Grand Bretanha a Port Moresby lo primièr rescontre internacional: partida perduda per l’esquipa nacionala locala 40-12. Dempuèi 1985, los Kumuls participan a las Copas del Monde e foguèron convidats al Torneg de las Quatre Nacions en 2010. En 1986, capitèron de batre los Kiwis 24-22. L’esquipa oceaniana compren una mitat de jogaires que disputan lo campionat nacional (de 10 esquipas) dins un país ont lo XIII ocupa una plaça centrala.
 
Mas an tanben una autra mitat de jogaires d’NRL: McDonald (Roosters), David Mead (Gold Coast), James Segarayo (Penrith), Ray Thompson (North Queensalnd)... E de Superliga o Championship: Jason Chan (Huddersfield), Joe Nandye (Whitehaven), Menzie Yere (Sheffield)...
 
Lo capitani-talonaire Paul Aiton es plan conegut de l’entraïnaire dels Blaus, Richard Agar, que lo dirigís a Wakefield, mas lo papó es anonciat a Leeds per la sason venenta.
 
Lo govèrn, d’un Estat de sèt milions d’estatjants e de 800 lengas, sosten l’esquipa: un sosten financièr primièr qu’a permés de far rampèl a la legenda australiana Malcom Meninga coma conselhièr tecnic per segondar l’entraïnaire principal Adrian Lam, l’ancian mesclanha de Wigan; lo govèrn es ja intervengut al prèp de l’NRL per demandar la preséncia d’una franquesa papó dins lo campionat australian. La competicion mondiala es d’una importància maja pel país per existir al plan internacional, non solament esportiu mas geopolitic.
 
Pels jogaires, en mai de l’engatjament collectiu, cal comptar amb las motivacions personalas de se mostrar als recrutaires d’Austràlia e d’Euròpa: ja, lo pilar Enoch Maki e lo centre-segonda linha Francis Paniu son anonciats a Hull KR e, tre la fin de la competicion, lo centre Dion Aiye portarà lo malhòt jaune e negre de l’AS Carcassona XIII.
 
Una partida contra los papós es pas una partida de plaser e de rugbi-floreta: l’esquipa prepausa de contunh un jòc nharrut e fisic, mas un pauc estereotipat. En resumit: cal anar al combat mas pensar de faire córrer la pauma e de prene d’iniciativas ofensivas. Lo moral, la nhaca e l’enveja faràn la diferéncia. Los Pols son avertits!
 
 
 
 
Alan Roch
 
 
_____
 
— Copa del Monde: “Que la fèsta comence!”, çò declara lo primièr ministre d’Anglatèrra, lo David Cameron.
— Premsa: lo Midòl acompanha son numèro d’aqueste diluns d’un quasèrn especial de 8 paginas sus la Copa del Monde.
— Un fum d’informacions suls preparatius e lo debanament de la Copa.