Christophe Pommeray, president del grop d’oposicion (PRG-PS-SE) a la comuna de Vichèi (Limanha Borbonesa), envièt ièr a Yann Barthès, lo presentaire de l’emission francesa Le Petit Journal de Canal Plus, 24 774 pastilhas Vichèi, a rason d’una per abitant de la municipalitat. Amb aquel gèst, Pommeray cèrca de dissociar lo nom de la vila occitana del regim del Marescal Pétain que li es tròp sovent associat.
 
Diluns, après un reportatge sus una manifestacion catolica integrista a París (França), que se i podiá ausir qualques declaracions de manifestants fòrça intolerantas, lo jornalista qualifiquèt la protèsta integrista coma “la manifestacion que sent bon la pastilha Vichèi”, en mostrant d’imatges dels bombons octogonals que son ja un simbòl de la vila termala.
 
Dins la letra joncha al mandadís, lo conselhièr municipal indiquèt que “Vichèi, aquò es una vila, que ni apelèt, ni sostenguèt, mens o mai que ges d’autra en França, lo govèrn de rescontre que s’installèt dins sos murs en junh de 1940.”
 
De fach, a Vichèi n’an pro. Mai de seissanta ans après lo regim del dich “Estat Francés” del Marescal Pétain (1940-1944), divèrsas apelacions emplegan lo nom de la vila de la Limanha Borbonesa dins un sens negatiu. Es frequent d’entendre en francés lo nom de Vichèi (dison Vichy) coma sinonim de traïson, d’esperit de capitulacion e quitament de nazisme. E lo jornalista arpitan, amb sa badinada, aqueste còp a passat l’òsca.
 
Dempuèi 2009, lo grop municipal de Pommeray ten un blòg que susvelha l’emplec marrit del tèrme “Vichèi”.