De milièrs d’ensenhaires e d’estudiants manifestèron dijòus passat per tot l’estat espanhòl contra la reforma educativa (LOMCE segon sa sigla en espanhòl), impulsada pel ministre José Ignacio Wert, dins l’encastre d’una jornada de cauma generala dins las escòlas, los collègis e las universitats. Aquela cauma aguèt un seguiment màger segon los sindicats, e un seguiment mendre segon las administracions.
 
Las manifestacions foguèron nombrosas (250 000 personas a Madrid e 170 000 a Barcelona). Per totas las vilas de l’estat, marchèron de mond de totes los atges en vestissent una camiseta jauma coma simbòl de l’escòla publica. En Aran, las protèstas se debanèron davant l’Escòla Garona e l’Institut d’Ensenhament Segondari d’Aran: revendiquèron que non s’apliquèsse la lei del ministre Wert e manifestèron tanben contra las reduccions budgetàrias del govèrn de Catalonha dins l’ensenhament.
 
 
L’immersion en occitan en perilh en Aran
 
La lei, qu’ara deu passar lo vòte del Senat, establís que l’espanhòl es la sola lenga veïculara dins tot l’estat, crèa d’examens d’avaloracion centralizats a Madrid en fin de primària e segondària e redusís lo poder de las associacions de parents d’escolans.
 
Las matèrias restacadas a las lengas dichas cooficialas (occitan, catalan, galèc e basco) se considèran de matèrias d’especializacion opcionalas. Lo PP argumenta que sa lei vòl “esclarzir que lo castelhan pòt pas èsser expulsat ni mesestimat dins lo sistèma educatiu”. Mas se s’aplica aquela lei, perdrem l’immersion en aranés dins las escòlas d’Aran.
 
Al delà, los ensenhaires denóncian que s’agís d’una lei “centralista, classista e mercantilista” que promòu la privatizacion de l’educacion.