Davant 50 000 espectators, dins l’Estadi del Millenium (Caerdydd), una ceremònia de dobertura colorada e musicala precediguèt l’entamenada de la primièra oposicion de la Copa del Monde entre Anglatèrra e Austràlia. Los angleses se mostrèron los mai lèstes a la manòbra e marquèron dos còps: per l’alièr Ryan Hall (8a) puèi pel centre Cudjoe a la represa d’un còp de pè a seguir de Sinfield que transformava. Atal, a la 20a minuta, la Ròsa menava 10-0. Mas lo darrièr quart d’ora del primièr temps anava èsser australian amb tres conclusions: Thurston (27a) a la represa d’un còp de pè a seguir,  puèi l’èx-Drac Bird (36a) e l’arrièr Slater traucava la defensa anglesa a la darrièra minuta sus sortida de mesclanha. Amb las 3 transformacions de Thurston (que serà designat òme de la partida), los Cangorós tornavan al vestiari amb un avantatge de 18-10. Confortavan lor avança per un novèl ensag transformat de Brett Morris (45a), mas George Burgess replicava en fòrça (50a). Los angleses pagavan lor indisciplina d’una penalitat (64a). Boyd confirmava la supremacia australiana per un ensag sus son ala (71a). L’ensag de Charnley sus una pauma perduda (74a) podiá pas cambiar lo sòrt de la partida e la victòria logica 28-20 dels Cangorós qu’an balhat l’aire de poder accelerar a lor enveja. De mai, auràn retenguda la leiçon de 2008 per jogar la finala (ont seràn mai que probable) amb determinacion!


Se passèt puèi a la segonda partida entre Galas e Itàlia (partida crosada entre polas C e D). Se vesiá sul pic que se tirava pas dins la meteissa categoria que dins lo rescontre de dobertura, mas la partida valguèt per son indecision fins a l’ora de jòc. A la pausa, los blaus italians menavan 14-12. A la 42a minuta, los Diables Roges passavan davant (sus una novèla passa al pè, accion que ven l’arma fatala!), mas a l’ora de jòc, la melhora perforacion dels avants blaus e lo melhor manejament de la pauma per las linhas d’arrièr balhèron la victòria a Itàlia per sa primièra partida dins una fasa finala de Copa del Monde: 32-16.
 
Aqueste dimenge, plaça a las partidas de la pola B: França-Papoa-Nòva Guinèa (17h) e Nòva Zelanda-Samoa (19 h)
 
 
Rebombs de pauma
 
Lo Prince Carles recebrà una delegacion de la Copa del Monde aqueste dimars.
 
L’Équipe d’aqueste dissabte balha lo nom dels dètz tretzistas de legenda: Puig-Aubert,  Élie Brousse, Gilbert Benausse, Jean Galia, Jean Barthe, Max Rousié... e L’Équipe-Magazineconsacra un article, senhalat en primièra pagina, als Kiwis.
 
Aqueste dissabte de vèspre, pel compte del campionat d’Elèit, Limós a batut Avinhon 34-22.
 
 
 
 
Alan Roch