De cercaires estatsunidencs an creat un metòde de restauracion que pòt regenerar la creissença del pel uman. Aquela formula permetriá la transplantacion a las femnas qu’an pas pro de pels e als òmes dins las primièras estapas de la calvícia. Lo resultat de l’estudi, fach pel Centre Medical de l’Universitat de Colúmbia, es publicat dins l’edicion numerica de Proceedings of the National Academy of Sciences.
 
“Aperaquí 90% de las femnas que pèrdon de pels se pòdon pas sometre a la cirurgia de transplantacion de pel”, çò ditz la professora de dermatologia Angela Christiano, corresponsabla de l’estudi. “Aquel metòde ofrís la possibilitat d’induire un grand nombre de folliculs piloses a partir de cellulas cultivadas gràcias a qualques centenats de pels donadors”, çò explicava la professora.
 
Per provar aquelas ipotèsis, los cercaires amassèron de papillas dermicas de sèt donadors umans e ne clonèron las cellulas en de culturas de teissuts, sens i apondre de factors de creissença. Qualques jorns puèi, las papillas cultivadas se transplantèron entre lo dèrma e l’epidèrma de la pèl umana, empeutada sus l’esquina de mirgas. En cinc assages de sèt, las transplantacions donèron coma resultat la creissença de pel que durèt almens sièis setmanas. Las analisis d’ADN confirmèron que los nòus folliculs èran umans e geneticament coïncidents amb los donadors.
 
Aquel sistèma nòu a la capacitat de far créisser de folliculs piloses novèls en emplegant de cellulas del quite pacient. La cercaira soslinha qu’“aquò poiriá agrandir notablament l’utilitat de la cirurgia de restauracion del pel per las femnas e pels pacients mai joves, pr’amor qu’ara lo tractament se limita en granda part a la calvícia del modèl masculin dins los pacients amb una malautiá establa”. Pasmens, los scientifics creson que cal aprigondir los estudis abans d’assajar la formula en d’èssers umans. Los cercaires dison que cal contunhar d’analisar de factors coma la color, l’angle, la posicion e la textura del pel.