La cap de l’oposicion birmana, Aung San Suu Kyi, recebèt lo 22 d’octòbre passat lo prèmi Sakharov del Parlament Europèu, 23 ans après son autrejament. Aung San Suu Kyi, dins sos 69 ans, recebèt lo prèmi esmoguda, de las mans de Martin Schulz, president de l’Eurocambra. Los eurodeputats recebèron la cap birmana quilhats en fasent un long aplaudiment.
 
En 1990, lo Parlament Europèu reconeguèt sa lucha en favor de la democracia e dels dreches umans davant la dictatura militara que governava Birmania alavetz. Mas Aung San Suu Kyi poguèt pas anar quèrre son prèmi perque èra assignada a domicili. Un an puèi li concediguèron lo prèmi Nobel de la Patz.
 
Aung San Suu Kyi foguèt liberada en 2010 e, uèi, dirigís l’oposicion parlamentària dins lo procès de dobertura democratica que lo regim birman impulsa.
 
Lo Prèmi Sakharov per la Libertat de Consciéncia se nomena aital en onor del dissident e scientific sovietic Andrei Sakharov. Lo Parlament Europèu establiguèt aquel prèmi en decembre de 1985 per far omenatge a las personas o organizacions que trabalhan en la defensa dels dreches umans e de las libertats. Se concedís cada annada e se liura a l’entorn del 10 de decembre, jorn que se signèt la Declaracion Universala dels Dreches Umans de las Nacions Unidas.