Entre pluèja e ventòrla, las condicions per jogar al rugbi èran pas de primièras al Craven Park d’Hull, ont se ramosèron 8 000 espectators aqueste dimenge de vèspre. Fàcia als papós, los Blaus dobrissián la marca tre la 5a minuta sus una carga plena de determinacion del dobertura Tomàs Bòsc que transformava sa realizacion. Mas a la 17a, l’alièr McDonald profeitava d’una situacion confusa per marcar. Lo planchòt cambiava pas fins a la pausa. Tre la represa, lo pilar Simon se fasiá blocar per la defensa jauna, tombava la pauma; sus l’accion que seguissiá, los papós passavan davant 8-6 mercé a l’autre alièr Abavu. Bòsc egalizava sus penalitat (58a) e Barthau balhava l’avantatge als Blaus sus un brave tombat (63a). Los Blaus sarravan la defensa, mas a doas minutas del tèrme, los papós tustavan una candela atal-atal, Barthau mancava la recepcion, un Blau repreniá la bala davant el... Fòra jòc: èra la penalitat 20 mètres fàcia als pals. La Victòria dobrissiá la doçor de sos braces als Aucèls de Paradís e aquí adveniá lo miracle del pè torçut (version occitanocatalana) o la malasòrt del pè torçut (version papó). L’arrièr Mead, qu’aviá ja mancat las doas transformacions, mandava la pauma… a l’esquèrra dels pals! La victòria èra pels Blaus: 9-8! Una victòria que s’apièja mai que mai sus una defensa solida e que dobrís en principi sus la qualificacion pels quarts.
 
En seguida, a Warrington, a bilhetariá tancada (15 000 espectators), los campions del Monde kiwis dintravan en competicion contra Samoa. Los neozelandeses prenguèron lèu l’avantatge per menar 22-4 a la pausa. A la represa, demoravan sul meteis ritme per menar lèu-lèu 36-4. Aquí sortiguèron de la partida e los samoans trapèron de traucs dins la defensa negra per tornar a 36-24 amb lo sosten del public anglés. Mas los Kiwis afortiguèron que demoravan los patrons amb un darrièr ensag: 42-24.
 
Los Blaus, que seràn tre aqueste diluns a Avinhon, sabon çò que los espèra divendres fàcia a la Nòva Zelanda (Avinhon) e l’11 de novembre fàcia a Samoa (Perpinhan).
 
Aqueste diluns, se jòga a Rochdale la segonda partida de la primièra jornada en pola A entre Fiji e Irlanda, una partida que determinarà lo tresen qualificat de la pola darrèr Austràlia e Anglatèrra. Los irlandeses auràn pas la partida bèla dins la vila la mai fijiana (aprèp Londres) d’Anglatèrra. Dins las annadas 60, dos fijians portèron lo malhòt de l’esquipa locala dels Hornets: Joe Levula e Orisi Dalai. Una granda fèsta fijiana (repaisses, musica...) es prevista per aquela partida que los irlandeses jogaràn vertadièrament  “a l’exterior”!
 
 
Rebombs de pauma
 
De veire. Se l’avètz mancada, la partida França-PNG es retransmesa un còp de mai aqueste diluns de matin (11h45) sus BeIn Sport 2.
 
La badinada. Un còp traucada la defensa samoana, emportat per son vam, Sonny Bill Wiliams despassèt la linha de balon mòrt sens aver lo temps de puntar la pauma per l’ensag!
 
En Elèit. Resultas espantantas aqueste dimenge en campionat: Tolosa se contenta de l’egalitat a Vilanuèva (24-24). E que dire d’una esquipa de Carcassona transparenta que se fa marchar suls pès pels catalans energics e solidaris de Palau del Vidre? 31-16.




Alan Roch