La Fèsta annala de la Catedrala Vièlha de Lhèida foguèt consagrada ongan a l’An d’Occitània. Dins aquel sens, la dimenjada passada, d’autoritats e d’artistas araneses ne protagonizèron la celebracion. Cal dire qu’es precisament en aquel endrech, fa sèt cents ans, que lo rei Jaume II^d d’Aragon signava a Lhèida (Catalonha) la Querimònia, lo privilègi que configurèt e donèt de legitimitat als dreches istorics d’Aran.
 
Dins los actes d’ongan, la ceremònia dels Prèmis Sès Vielha 2013 comptèt dissabte amb la preséncia del cap de la politica lingüistica del govèrn d’Aran, Jusèp Loís Sans, e del cap de la cultura, Jèp de Montoya, que remembrèt la signatura de la carta magna aranesa en aquela encencha. “Deth 12 ath 23 d’agost, en aguest recinte, en aguest entorn se gestèc e materializèc era que siguec e li cau contunhar d’èster era pèira angulara deth bastiment de tot eth vier istoric dera Val d’Aran e qu’a fin de compdes eth moment contemporanèu e democratic a servit entà articular çò que podem nomentar eth hèt diferenciau aranés”, çò diguèt.
 
La cantaira aranesa Alidé Sans i ofriguèt un concèrt.
 
Dimenge se i debanèt lo Festenal de Musica e de Dança que i participèron dos grops araneses: Es Corbilhuèrs de Les e Sarabat d’Aran.
 
La vila catalana a barrat aital una seguida d’activitats restacadas a l’An d’Occitània, en remembrant los 800 ans de la Batalha de Murèth, los 700 ans de la signatura de la Querimònia e los 500 ans del Tractat del Plan d’Arrem.