La tragica mòrt dels jornalistas franceses Ghislaine Dupont e Claude Verlon en mans d’un grop islamista a Kidal a tornat metre lo conflicte toarèg sus totas las primièras paginas dels mèdias del Mond. E, malgrat totas las confirmacions dins lo sens que los assassins foguèron d’integristas islamics, los movements sobeiranistas d’Azawad son estats meses al ponch de mira d’un biais grossièr e intencional.
 
Revisem los faches: los dos jornalistas sortissián de far una entrevista amb un responsable politic del Movement Nacional de Liberacion d’Azawad (MNLA), a Kidal, quand foguèron raubats per un comando armat e assassinats fusilhats, a dotze quilomètres del luòc de la sequestracion. Las fòrças militaras de Mali e França, presentas a Kidal, poguèron pas evitar los faches, e o poguèron pas far tanpauc las fòrças armadas del quite MNLA. Totes los indicis visan lo fach que qualques toarègs serián implicats dins lo crime, mas de fonts de l’MNLA remembran que qualques toarègs fan partida de grops integristas armats coma Ansar Ad Din o quitament Al Qaida del Magrèb Islamic (AQMI).
 
De fonts de l’MNLA an denonciat que s’es acusat lo movement sobeiranista toarèg d’èsser complice o quitament d’èsser responsable del doble assassinat. Dins aquel sens, acusan certans mèdias de Mali de crear de confusion entre la populacion per restacar los toarègs amb lo terrorisme. Pasmens, los acòrdis de patz signats en junh passat establiguèron que las fòrças militaras de l’MNLA serián concentradas en certans ponches e que la seguretat del nòrd de Mali, comprés Kidal, restariá en mans de l’armada francesa e de sos aliats regionals. De fach es evident que lo quite MNLA es lo primièr interessat a ofrir un imatge de seguretat d’Azawad. Se cal demandar, doncas, a qui conven d’ofrir un imatge contrari per motivar, encara mai, una intervencion internacionala armada e lo restabliment del contraròtle del territòri de la part del govèrn de Bamako.