Lo Jorn de Catalonha Nòrd, que cada an clava la corsa de la lenga catalana nomenada Correllengua, e que revendica d’escafar lo Tractat dels Pirenèus, se celèbra uèi amb una crida a entornejar las institucions a Perpinhan.
 
Lo Tractat dels Pirenèus, signat per las monarquias francesa e espanhòla en 1659, simboliza la particion de Catalonha, la pèrda de las institucions pròprias en Catalonha Nòrd, lo començament de la descatalanizacion sistematica del país e la resisténcia de l’identitat catalana als divèrses regims franceses.
 
Ongan, vòlon far una cadena umana qu’entornege las bastissas de las institucions del país a Perpinhan, en seguissent l’estil de la Via Catalana de l’11 de setembre passat. Se passarà a 16h59 (ora simbolica en remembre de l’an 1659).
 
E mai, coma cada an, i aurà los actes davant lo Castellet, una marcha de tesas e un concèrt. Las celebracions contunharàn deman amb un debat a la Sala Aragon de l’Ostal de la Vila sus “Quina via nos cal seguir?” Aquel debat cèrca de far lo bilanç de las institucions del país e de presentar de revendicacions a las municipalitats e als conselhs general e regional. I participaràn la presidenta d’Òmnium Cultural, Muriel Casals, e aquela de l’Assemblada Nacionala Catalana (ANC), Carme Forcadell. O presentarà lo president de la Federacion de las Entitats de Catalonha Nòrd, Miquel Arnaudies.
 
Lo Tractat dels Pirenèus se passèt lo 7 de novembre de 1659, mas las celebracions se fan uèi pr’amor que dijòus èra pas un jorn feriat.