La pluèja tombava fina dins una temperatura fregeluga de tardor aqueste dimenge 20 de mai a l’Egassieral de Narbona. Carcassona e Pià se tornavan trapar sus la pelena, una setmana aprèp la victòria occitana en campionat (26-20), per la finala de la Copa Lòrd Derby seguida per sèt milierats d’espectators. Per sa darrièra partida abans sa retirada esportiva, Roman Gagliazzò, privat de finala del campionat per la Comission de disciplina, portava lo braçal de capitani dels canaris.

 

Tre l’entama, la defensa catalana trastejava sus la recepcion d’un còp de pè e lo segonda linha Florenç Roanet puntava l’ensag que Jeremi Guiraud transformava. Gressèque replicava per una penalitat, puèi Guiraud i anava de la seuna. A la 38ena, aprèp una passa al pè cap a l’ala dreita, la pauma tornava duscas a l’ala esquèrra ont Carrère marcava al pè del bandieret de canton pels Pianencs. La transformacion de Gressèque tocava lo pal e dintrava pas : 8-6 a la pausa pels Occitans. Èra pas lo jorn de las grandas envoladas liricas mas d’una batèsta nharruda e seriosa: la pluèja e lo tarrenc a l’èrba limpaira s’ajustavan a la lassièra emmagazinada dins las gròssas partidas de las fasas finalas del campionat. Dins aquela espròva de fòrça, al cap de la volontat de ganhar, qual plegariá lo primièr? Gressèque passava una penalitat (46ena) e Pià egalizava. A la 54ena minuta, Gressèque tustava a seguir, los Carcassonees contrarotlavan pas la pauma e l’insasissable Carrère marcava son segond ensag. Pel primièr còp, los Catalans passavan davant al planchòt 12-8.

 

Mas, metodicament, las cargas de sos avants e los còps de pè del dobertura Aitken permetián a Carcassona de s’acercar de la linha catalana. Pià se metiá a la fauta, lo pè de Guiraud tremolava pas e l’arrièr canari ne profitava per enquilhar tres penalitats (60ena, 68ena e 70ena). Atal, la marca passava a 14-12 per son equipa que tornava menar la copa a Carcassona e signava un supèrbe doblat Campionat-Copa, non realizat per la formacion audenca dempuèi 1967. Quaranta-cinc ans d’espèra…

 

Pels catalans, demorava de se demandar de qu’èra advengut per elis que se cresián los mai fòrts e los mai bèls amb una tièra d’un vintenat de partidas victoriosas en seguida dempuèi la tardor. I agèt un brave rambalh jol Mercat de la Polalha aqueste dimenge a Carcassona. En mai de la Primièra, los juniòrs celebravan la Copa Nitard ganhada en dobertura fàcia a Lesinhan (revenge del campioant) , sens un plèc : 26-19. Los minimes de la MJC (Ostal dels Joves de Carcassona) brandissián la Copa de França de lor categoria ganhada dijòus a Lesinhan fàcia als Catalans de Tologes (27-20), alara qu’Avinhon emportava la Copa dels cadets en batent 36-26 lo XIII Catalan.

 

Dijòus tanben, a Carpentràs, los Catalans de Palau ganhavan la finala del campionat d’Elita 2 fàcia als Broncòs de Tolosa: 34-17. La sason es pas acabada per Carcassona, Pià, Avinhon e Tolosa que, per la primièra dimenjada de junh rescontraràn equipas anglesas de League One dins una prefiguracion d’una Copa d’Euròpa. Atal, los Canaris aculhiràn sus la pelena de Domèc las Aglas de Sheffield, lo dissabte 2 de junh.

 

Dissabte, sus la pelena del Molin, se reglava la question de la supremacia audenca en Federala e, jos la pluèja, Vilagalhenc-Argon emportèt lo quart del campionat de França de nacionala 2 fàcia al Lauquet: 15-14.

 

Dimenge, los Dracs fasián coneissença amb la pelena sintetica dels Vikings de Widnes e se devián emplegar per l’emportar dins las darrièras minutas fàcia la darrièr de la classa: 42-34. Dimenge, los sang e aur jogaràn dins l’estadi dels campions de fotbòl angleses, lo del Manchester City, e pel compte de la Dimenjada magica¹ se veiràn confrontats a la formacion londoniana.

Los Dracs an animat talhièrs rugbí a l’escòla catalana "La Bressola", an respondut a las questions dels escolans dins una discutida menada en anglés e catalan. Lo segonda linha neo-zelandés Louis Anderson a promés de tornar a La Bressola per s’iniciar al catalan. Los escolans seràn convidats per cantar una version modèrna de l’imne Els Segadors en principi per la venguda de Wakefield lo dissabte 30 de junh a Brutus.

 

Alan Roch

_____

¹ Dimenjada magica/ Magic Week-end : jornada suplementària del campionat de super-Liga que vei lo dissabte e lo dimenge se debanar sèt partidas entre las equipas (Extra-games : confrontacions establidas segon lo classament de l’annada d’abans).