Lo primièr ministre francés, Jean-Marc Ayrault, anoncièt divendres passat, dins l’encastre de sa vesita a Marselha, que l’estat investiriá “mai de tres miliards d’èuros” per melhorar los transpòrts urbans e interurbans de la Ciutat Focèa, per acabar las òbras de l’autoestrada qu’entorneja la vila, refortir los efectius de polícia e abrivar la renovacion e lo desenclavament de cèrtas ciutats arroïnadas dels Quartièrs Nòrd.
 
S’agís d’un investiment impressionant, mai que mai se nos avisam que França vei son marge de manòbra budgetària sancionat per Standard & Poor’s.
 
Aquel “esfòrç poirà beneficiar a l’aglomeracion perque se serà dotada d’una metropòli e d’un apròchi global e organizat dels desplaçaments urbans”, ço expliquèt lo ministre.
 
La promessa compren la realizacion d’una gara sosterranha a Sant Carles, principala gara ferroviària de Marselha. Un autre projècte es lo doblament parcial de la linha Ais de Provença-Marselha e tanben se promet d’estendre lo mètro e de refortir lo servici d’emplec. Los Quartièrs Nòrd se requalificaràn en prioritat.
 
Per çò qu’es dels policièrs, se’n promet 80 de suplementaris al començament de 2014. Dins aquel sens, Ayrault remembrèt que “407 pòstes de policièrs e gendarmas suplementaris son estats afectats per la polícia judiciària e per la seguretat publica, dins los quartièrs, mas tanben a l’entorn del pòrt”.
 
Lo plan encara promet la creacion de 1000 plaças de gardariá d’enfants e de 8 nòvas classas en pichona seccion d’escòla mairala, dont 5 als Quartièrs Nòrd, per favorizar l’escolarizacion dels menors de 3 ans.
 
Aquela promessa es venguda a quatre meses de las eleccions municipalas. La diguèt Ayrault al costat del candidat socialista, Patrick Mennucci, qu’aurà de besonh de fòrça promessas coma aquesta per véncer l’actual cònsol, Jean-Claude Gaudin de l’UMP.
 
Gaudin assegurèt que 70% dels crèdits de renovacion urbana (210 milions d’èuros) son pas engatjats. De son costat, Hubert Falco, lo senator-cònsol UMP de Tolon, reagiguèt indignat: “Aquò s’es jamai vist en matèria de clientelisme e de politica dei pichons companhs. En fasent aquò, Sénher Ayrault fa mòstra d’una estranha concepcion de la neutralitat de l’estat e de l’egalitat dei territòris”.
 
Una de las tòcas de la vesita d’Ayrault èra de reconciliar los candidats finalistas de la primària marselhesa pel Partit Socialista, Patrick Mennucci e Samia Ghali. Dijòus de ser, lo primièr ministre aviá participat a un sopar dins un restaurant près del Pòrt Vielh, amb sièis candidats a las primàrias e de responsables socialistas marselheses. “Ara, avètz pas drech de vos encalar”, çò lor diguèt. “Trobaretz una solucion amb un govèrn que vos sosten”, çò apondèt.