Sièis esquipas n’an acabat amb l’edicion 2013 de la Copa del Monde. Doas auràn pas plan de camin de faire per s’entornar a l’ostal: Irlanda e Galas. Per Irlanda, la competicion se joguèt sus la partida contra Fiji e perdèt. Per Galas, avèm ja escrit aicí qu’es la decepcion bèla de la competicion: l’esquipa manquèt d’èime de longa. Tresena formacion europèa eliminada: Itàlia, levat qu’amb lo sistèma de qualificacion èra compausada quasi exclusivament d’australians, pichons filhs d’emigrats. Aquò pausa un problèma: es qu’ajuda lo desvolopament del XIII dins la Peninsula? Es que la Copa del Monde pòt èsser una competicion interNRL dels païses d’origina dels jogaires? Per Papoa-Nòva Guinèa, la qualificacion se joguèt sus la penalitat mancada fàcia a França. La formacion s’apiejava sus un cèrt nombre de jogaires del campionat nacional. PNG anirà pas mai luènh se contunha de prepausar un jòc estequit e morrut. Las Illas Cook prepausèron un jòc plasent: de segur, caldriá mai de rigor e un menaire de jòc eficaç, mas lo romantisme es plan agradiu. Demòra Tònga que passèt pas plan luènh de la qualificacion e que fa pròva d’un bèl estrambòrd sus la pelena.
 
Las formacions eliminadas an totas jogat lo jòc: cap abordèt los rescontres en victima e permetèron de seguir de partidas plasentas e engatjadas.
 
Demòran sèt partidas per conéisser lo campion del XIII: los quatre quarts de la dimenjada, las mièjas finalas de Wembley (dissabte 23) e la finala bèla de Manchester (dissabte 30 de novembre).
 
 
Lo campionat de retorn
 
Mas, al país, tre la dimenjada que ven, ne serà acabat de la pausa del campionat Elèit.
 
Son al programa per dissabte 16: Tolosa-Limós (16h) e Avinhon-Palau (16h30); e per dimenge 17: Dragonets-Vilanuèva (15h30) e Carcassona-Lesinhan (16h). Los Dragonets an ja doas partidas de retard que se disputaràn del temps de Nadal contra Tolosa (dimenjada del 22/12) e contra Lesinhan (dimenge 29/12). Es que faràn tornar jogar lo fait qu’an mai de 3 seleccionats per demandar un novèl remandadís? Aquò complicariá lo debanament e lo calendièr de la competicion. Carcassona coneis unes guirguilhs intèrnes aprèp la desfaita a Palau e 4 jogaires son indisponibles per l’an. Al pè de Ciutat, s’espèra l’arribada (mas quand totes los papièrs seràn reglats e la moneda trapada per pagar la quatrena licéncia d’estrangièr —10 000 euros —...) dels papós: lo polivalent Dan Aiye (autor d’un ensag contra lo Kiwis) e lo pilar Mark Mexico. A miègjorn, jol tibanèl de Domèc, una taulejada “medievala” metrà los espectators en forma!




Alan Roch