De figurinas d’Adolf Hitler fasent la saludacion nazi, del General Francisco Franco, de Mussolini, d’Stalin e quitament del Coronèl Antonio Tejero, pistolet en man, lo qu’ensagèt un còp d’estat en Espanha en 1981, e d’autras. Tot aquò se pòt trobar dins una botiga d’objèctes istorics, plaçada a l’avenguda Paseo del Prado, a qualques mètres del musèu mai vesitat de Madrid. L’informacion l’a publicada lo jornal La Clau, que soslinha que se paga fins a 120 èuros per aquelas petitas estatuas.
 
Lo jornal nòrd-catalan remembra que la venda d’objèctes istorics, quals que sián, es legala dins l’estat espanhòl, “e mai s’aqueles articles, visibles dins la veirina, supèran ostensiblament lo domeni scientific en benefici de la bendisença dels personatges miniaturizats”.
 
Totas aquelas figurinas son plan visiblas pels centenats de vesitaires que frequentan la zòna, ont i a lo Musèu del Prado, lo Musèu Thyssen e las ostalariás Ritz e Palace.