Craig Cobb, un supremacista blanc conegut qu’es a crear una enclava racista en Dakota del Nòrd (Estats Units), ven de recebre una revirada dins l’enregistrament d’un programa per la television. La celèbra jornalista Trisha Goddard l’entrevistèt per son programa, un dels mai vistes als Estats Units. Per aquela entrevista faguèron a Cobb un examen d’ADN e Goddard, qu’es negra, li legiguèt lo resultat de son ascendéncia: per 86% es europèa e per 14% ven de l’Africa Subsahariana.
 
Cobb recebèt la nòva amb un sorire fixe, aprèp agachèt a l’entorn e diguèt qu’aquel resultat èra de “bruch estatistic”. Lo public crebava de rire.
 
Goddard li diguèt: “avètz un pauc de negre dins vos”. Mas lo celèbre neonazi èra pas d’acòrdi: “l’òli e l’aiga se mesclan pas”, çò diguèt. Alavetz la jornalista se quilhèt e lo saludèt amb un còp de ponh en disent “òu fraire”, una saludacion correnta entre negres estatsunidencs, mas lo racista tornèt pas aquel salut.
 
Cobb declarèt al Daily Mail qu’èra d’acòrdi amb la pròva genetica, perque “supausava qu’èra de sciéncia”, mas refusèt los resultats, en los qualificant de defectuoses e produches per d’emplegats de television “coards e degradants” que sonque cèrcan lo chòc per “promòure lo multiculturalisme”.
 
E mai s’un autra pròva confirmèsse aqueles resultats genetics, lo cap nacionalsocialista estatsunidenc diguèt qu’el se considèra coma un “gardian de las frontièras per los de raça pura”.