Divèrses païses e organizacions internacionalas an ja començat de mandar l’ajuda umanitària a las Filipinas, ont lo supertifon Haiyan a devastat tota la zòna centrala e poiriá aver fach mai de 10 000 mòrts, segon de fonts non oficialas. Las ONG calculan que las personas afectadas son aperaquí dètz milions qu’ara ensajan de subreviure sens aiga, ni manjar, ni electricitat, ni quitament pas un luòc ont se refugiar. De províncias entièras son afectadas, amb totas las vias de comunicacion talhadas. Al delà, lo nombre d’afectats pòt aumentar perque i a de zònas encara incomunicadas.
 
L’Union Europèa anoncièt abans ièr un nòu paquet d’ajuda de 8 milions d’èuros provenent dels fonzes europèus per la recuperacion economica e sociala de l’illa de Mindanao. Los Estats Units i mandaràn près d’un centenat de soldats, e las ONG i an ja començat de menar de personal medical, logistic e psicologic, de material sanitari e de tonas de noiridura.
 
L’UE a activat tanben lo Mecanisme de Proteccion Civila de l’UE per assegurar la coordinacion dels esfòrces d’assisténcia europèa. Segon l’eurocomissària de la cooperacion internacionala e de l’ajuda umanitària, Kristalina Georgieva, “la prioritat es de restaurar l’accès als airals alonhats tustats pel tifon, d’enviar urgentament d’ajuda umanitària als centenats de milièrs de personas que son demoradas sens ostal e d’assegurar qu’ajan d’aiga potabla per beure, de provisions de manjar e un refugi”.
 
Lo World Food Programme a mandat 40 tonas de chocolatinas energeticas, sufisentas per alimentar 120 000 personas per jorn, e divèrses esquipaments per facilitar las comunicacions dins las zònas devastadas. De son costat, l’UNICÈF a avertit que près de 4 milions d’enfants se poirián veire afectats per las consequéncias d’Haiyan e a mandat 1,3 milion de dolars en material per l’assaniment de las aigas, de noiridura e de kits medicalizats.
 
Divèrses estats membres de l’UE tanben an començat d’enviar de material. L’ONG Accion contra la Fam, per exemple, i a mandat un sit potabilizaire d’aiga, de depauses plegadisses, de latrinas d’emergéncia, de pompas d’aiga e un còla de tecnicians. A travèrs d’aquela meteissa ONG, la comuna de Barcelona a activat un don extraordinari de 30 000 èuros. Una còla de Mètges del Mond a refortit los efectius sus plaça, e Mètges sens Frontièras a mandat 200 tonas de material medical.
 
La Fondacion de França e mai d’una organizacion dels estats espanhòl, francés e italian an lançat de cridas als dons en esperant la mobilizacion dels ciutadans.