Israèl a decidit d’anullar la construccion de 24 000 abitanças novèlas en Cisjordania e a Jerusalèm Èst, que las prevesiá un nòu plan colonizaire revelat per l’organizacion Peace Now e lo jornal Haaretz. La pression dels Estats Units, que demandèron d’explicacions a Israèl, a forçat lo primièr ministre ebrieu, Benjamin Netanyahu, a tornar enrèire per rapòrt a aquel projècte.
 
Lo cap de l’executiu israelian a ordenat, doncas, al ministre de l’abitatge de reconsiderar l’iniciativa e li a recriminat d’aver començat lo projècte sens cap de coordinacion prèvia.
 
D’un costat, Netanyahu es un fervent defensor de l’expansion de l’ocupacion israeliana dins los territòris ont los palestinians son confinhats, mas de l’autre costat a admés que los plans israelians provocavan una confrontacion innecessària amb la comunautat internacionala. Lo president palestinian, Mahmud Abbas, menacèt de trencar lo procès de patz s’aquel projècte colonizaire israelian avançava.
 
Lo mes passat, Peace Now denoncièt qu’Israèl agrandissiá las installacions per colons malgrat la represa de las convèrsas de patz amb l’Autoritat Nacionala Palestiniana. Segon l’ONG israeliana, aperaquí 1700 abitanças se bastissián en Cisjordania.