Eth congrès que servic entà "refondar e actualizar er aranesisme de CDA, en un moment de cambis enes relacions entre Catalonha e Espanha e damb Euròpa", ce didec Àlex Moga, secretari generau. 

 

En declaracions ath jornau Segre, Moga afirmèc que "Convergéncia apòste per un autogovèrn màger, çò que passe per un nau sistèma de finançament que mos permete desvolopar un projècte pròpri que, ath delà, incorpòre naues competéncies entath Conselh Generau d'Aran". Eth secretari generau expliquèc que "s'agís d'ua pujada de categoria entà que non seguim solament coma ua entitat locau. Catalonha a de hèr damb Aran çò que Catalonha reclame a Madrid e que Madrid li nègue." 

 

Moga qu'insistic en besonh d'un nau finançament "sense renonciar a assumir mès competéncies". Ues competéncies que siguen adaptades ara realitat aranesa, coma per exemple, era gestion des borses universitàries.

 

Eth congrès qu'aprovèc dues ponéncies e que reelegic es cargues directius. Per un costat se reformèren es estatuts deth partit entà perméter mès agilitat en contacte damb es ciutadans, ua dubertura entàs naues tecnologies e un còdi etic entàs militants. Per aute costat s'aprovèc era ponéncia d'adaptar er "aranesisme" ara realitat deth sègle XXI en tot tier en compde aguest nau finançament e encastre competenciau. "Anam amassa damb eth catalanisme, mès eth catalanisme a de compréner que i a ua auta realitat nacionau en Catalonha", ce didec Moga.

 

Per çò qu'ei des cargues directius eth sindic d'Aran, Carlos Barrera, siguèc reelegit president de CDA, deth temps que Pau Perdices, deputat en Lhèida, n'ei eth vice-president. Eth baile de Vielha, Àlex Moga, ei estat reelegit secretari generau. Ath delà, Victòria Saurina ei era secretària d'organizacion e José Luis Boya, eth president d'aunor.

Eth congrès compdèc damb era participacion d'Oriol Pujol, eth secretari generau de Convergència Democràtica de Catalunya.



Ferriòl Macip