Lo procès deus “entartaires” de Yolanda Barcina que’s tienerà, diluns 18 de noveme, a Madrid. Que son acusats d’“atemptat a l’autoritat” e qu’encorren de 5 a 9 ans de preson ferma.
 
Raperem los fèits: lo 27 d’octobre de 2011, mentre qu’èra en ua amassada de la Comunautat de Tribalh deus Pirenèus a Tolosa, la presidenta de la region Navarra que’s recevó tres tartas a la crèma suu cap, mesas per tres personas diferentas. Puish autas personas que despleguèn bandaròlas e que cridèn eslogans en occitan e en autas lengas contra lo projècte de LGV Bordèu-Espanha.
 
Dens los activistas qui cridèn e qui afichèn bandaròlas, hèra que pertanhèn au movement occitan Libertat! mes los qui empeguèn las tartas suu cap de la presidenta qu’èran militants bascos deu movement Mugitu!. Aquestes dus movements que son opausats au projècte de linha de grana velocitat (LGV) Bordèu-Espanha qui, segon eths, polluiré, isolaré mei anar mei los territòris ruraus qui traversaré e guastaré miliards d’èuros de moneda publica au sol profieit d’ua minoritat: la deus qui pòden viatjar en TGV.
 
Au Bascoat e en Espanha, lo sostien aus tres inculpats que s’organiza: lo 12 de noveme, qu’estó ua jornada d’accions descentralizadas, lo 16 que’s tienerà ua manifestacion de sostien a Pampalona e lo 18, qu’ei prevista ua amassada davant la cort d’assisas de Madrid pendent lo procès.
 
 
 
 
Pascau Sebat