Lo Grop de Trabalh contra las Desaparicions Forçadas o Involontàrias, que pertanh a l’ÒNU, a exigit a l’estat espanhòl de metre en examen “totas las desaparicions” del franquisme “d’un biais exaustiu e imparcial, independentament del temps escolat, e mai se i a pas cap de denóncia formala”. Dins son rapòrt suls crimes del franquisme, l’ÒNU avertís que cal “despassar los obstacles juridics d’òrdre intèrne que pòscan empedir las recèrcas, mai que mai l’interpretacion que s’es facha de la lei d’amnestia”. Lo comitat recomanda tanben la creacion d’una comission de la vertat encargada “de determinar la vertat sus las violacions dels dreches umans del passat”.
 
Lo rapòrt del comitat de l’ÒNU contra las desaparicions forçadas reclama que “los presumits autors” dels crimes del franquisme sián “jutjats e, se son declarats colpables, sancionats segon la gravitat de lors actes” e que las victimas “recépian la compensacion adeqüata”.
 
Lo tèxt remembra que “la cèrca de las personas que son estadas somesas a de desaparicions forçadas e l’esclarziment de çò que lor arribèt son d’obligacions de l’estat”. L’ÒNU avertís que los parents de las victimas an “drech de saber la vertat”. Dins aquel sens, lo document aprovat pel comitat exigís qu’Espanha “adòpte totas las mesuras necessàrias, comprés l’assignacion de ressorsas e de personal, tecnicament e financièrament sufisentas, per cercar e esclarzir çò que se passèt” amb las personas desaparegudas.
 
L’ÒNU demanda a l’estat que “los relambis de prescripcion” dels delictes “se compten efectivament a partir del moment que s’acaba la desaparicion forçada, es a dire, quand la persona aparesca viva, quand se tròbe sas despuèlhas o quand se li restituisca l’identitat”.
 
Lo rapòrt soslinha que l’estat espanhòl deu establir “un organisme especific per cercar las personas somesas a una desaparicion forçada”, e qu’aja las ressorsas sufisentas per complir sas foncions “d’un biais efectiu”. Lo comitat demanda que se respècte “de manièra exprèssa lo drech a la vertat de las victimas” en acòrdi amb l’article 24 de la Convencion.
 
Dins aquel sens, lo comitat de l’ÒNU demanda la creacion “d’una comission d’expèrts encargats de determinar la vertat sus las violacions dels dreches umans del passat, mai que mai las desaparicions forçadas”. De mai, reclama tanben que l’estat garentisca “l’ajuda judiciària necessària, comprés lo porgiment de totas las pròvas qu’aja en son poder” per impulsar totas las enquèstas aviadas sus las desaparicions, tanben dins d’autres païses.
 
Lo rapòrt sollicita Espanha per que “garentisca que las personas suspèctas d’aver comés qualque delicte de desaparicion forçada sián pas en condicions d’influir dirèctament o indirèctament, elas meteissas o a travèrs d’autres, per empedir las recèrcas”.