Lo ministre de l’interior francés, Manuel Valls, confirmèt, delà ièr de ser, la detencion d’un òme que poiriá èsser lo tiraire que semenèt lo caos a París diluns passat. L’òme qu’auriá ferit un fotograf a la sedença de Libération, e auriá tirat dins la zòna de La Défense sens i ferir degun, seriá lo meteis que lo que lo divendres precedent aviá menaçat amb son fusilh la redaccion de BFM TV.
 
Lo suspècte es Abdelhakim Dekhar, un activista d’extrèma esquèrra condemnat en 1998 a quatre ans de preson per aver fornit un fusilh amb lo qual un parelh tuèron un taxista e tres policièrs en fugissent la polícia en 1994.
 
La polícia a confirmat que l’ADN del suspècte detengut delà ièr dins un pargatge de la banlèga de París es identic al qu’an trobat sus las dolhas de l’arma que feriguèt lo fotograf a Libération diluns passat. La detencion la facilitèt lo testimoniatge d’una persona que lotjava lo suspècte dempuèi doas setmanas e que lo reconeguèt dins los imatges difonduts per la polícia.
 
Segon qualques mèdias locals, Dekhar foguèt menat al comissariat en estat de semiinconsciéncia per qu’auriá ingerit una quantitat grandassa de medicaments. Segon Valls, s’agís d’un ensag de suicidi.
 
Abans de prene totas aquelas potingas, Dekhar auriá escrich una letra ont explicava qu’una conspiracion faissista dels mèdias e dels govèrns se seriá mesa en marcha, e i planheriá las guèrras de Libia, de Siria e l’opression que vivon las banlègas francesas.
 
Segon lo procuraire, François Molins, aurián trobada una autra letra de Dekhar, que seriá son testament. Molins tanplan a anonciat qu’una còla de psiquiatria mena l’enquèsta sus lo detengut.