Toti es nivèus educatius, des escòles mairaus enquias universitats, protagonizèren agèr ua jornada de cauma e de protèsta contra es "retalhades", ei a díder, contra es reduccions budgetàries impausades jos eth pretèxte dera crisi economica qu'an portat as govèrns dera Generalitat de Catalonha, e ath der Estat espanhòu, a redusir eth budgèt en servicis sociaus coma sanitat e educacion. Era jornada de cauma qu'arribèc tanben ena Val d'Aran.
Son totes es instàncies educatives, des escòles mairaus enquias post-obligatòries, coma era universitat, es escòles d'adults e es d'idiòmes, que son estades cridades ara cauma. De hèt, es organizadors considèren que s'agís d'ua convocacion "istorica", pera sua magnitud e pera unitat.
Eth seguiment dera cauma qu'ei disparièr segons es hònts. Es sindicats que parlen de 80%, deth temps qu'eth Govèrn espanhòu ne compde 19,41%. Es manifestacions e es protèstes per totes es principaus viles der estat se debanèren pacificament. Era polícia parle sonque de dus arrestats en Madrid e de cinc en Barcelona. Es mobilizacions son estades seguides pes ensenhaires e tanplan pes estudiants e pes pairs.
Es principaus sindicats dera educacion publica que cridèren a tota era comunitat educativa ara mobilizacion contra es "retalhades" ena educacion. Per un costat i a era reduccion de 21% des Pressupòsti Generaus der Estat de 2012, e per aute eth decrèt governamentau de mesures entà que, ath delà, es comunitats autonòmes estauvien mès de 3000 milions d'èuros. Eth ministre d'Educacion, José Ignacio Wert, expliquèc dimèrcles passat que "s'agís de mesures excepcionaus entà ua situacion excepcionau".
En Catalonha, era reduccion budgetària der estat se some ara "retalhada" dera Generalitat de Catalonha, çò que segons es sindicats, se revire ena pèrta de 5500 ensenhaires non universitaris entath cors que ven. Es sindicats asseguren qu'ath delà quauqui desenats de professors des autes estapes anaràn tanplan ath caumatge. Es darrères mesures aprovades pes govèrns catalan e espanhòu aumenten eth nombre d'escolans per aula e eth nombre des ores de trabalh des professors. Non se corbiràn es substitucions.
Era cauma qu'auec tanben de repercussions enes escòles dera Val d'Aran. Ena Escòla Garona de Vielha 31 ensenhaires, d'un totau de 43, an seguit era cauma; e tanplan 350 escolans d'un totau de 500. Non auem donades deth seguiment enes auti estudis dera Val.
Ferriòl Macip
Aquí coma pertot e subre cada sicut sociau d'a l'ora d'ara, me sembla que lo problèma compta au mens dos nivèus.
Lo primièr nivèu es que toteis leis servicis publics son degalhats un a un. Au finau, lo public, tant vau dire lo pòble, serà pas mai servit, se que non utilizat (o fòrabandit au caumatge de massa).
Per tant grèu que vos pòsca semblar aqueu primièr nivèu, me sembla que n'i un segond encara mai grèu qu'aqueu. La politica que per carrièra se donóncia, aquò's un politica de dreita dura. Rai, s'aquò's la vox populi que n'a decidit. Mas se lo pòble ven a votar a esquerra e que, lèumens, aquò's la meteissa politica que botan en plaça, alara, fau bèn dire que la democracia es mòrta. I a pas mai d'alternança possibla. Es la dreita o la dreita. Çò qu'adven adara n'es un deis resultats. En periòdi de crisi, nos impausan de pertot politicas de dreita dura. Se lo govèrn que fai aquò es d'esquerra, leis pòbles vòtan alara a dreita, e lo remèdi ven pièger que la malautiá !
Malurosament pensi qu'es sonque lo començament d'aquesta tragèdia de mesa a mòrt de l'escòla publica....
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari