La Republica Centreafricana, èx-colònia francesa, “es al bòrd del genocidi”, segon lo ministre francés dels afars estrangièrs, Laurent Fabius. Aital lo ministre justifiquèt l’anonci d’una intervencion militara dins lo país african, que “serà pas ni tan massissa ni tan longa” coma la que i aguèt en Mali.
 
Fabius se referiguèt als divèrses grops armats que i a dins lo país african, a las accions criminalas e al “milion e mièg de personas qu’an quitament pas res per manjar”. Segon lo ministre i a tanben lo perilh qu’aquel país venga “un nòu fogal del terrorisme coma Mali”, ont França ven d’intervenir. Lo govèrn francés a ja sa preséncia militara dins la Republica Centreafricana.
 
Mentretant, los Estats Units donaràn 40 milions de dolars per ajudar la fòrça militara de l’Union Africana que se desplegarà dins la Republica Centreafricana lo mes que ven. Lo secretari d’estat estatsunidenc, John Kerry, considèra qu’es lo melhor mecanisme per arturar la violéncia qu’afècta lo país. De mai, Kerry acusa l’actual govèrn, sorgit del còp d’estat del mes de març, de far pas res per cambiar la situacion.
 
Washington denóncia que, dins lo scenari actual, las milícias s’organizan cada jorn melhor e que las represalhas contra los civils aumentan. I a d’afrontaments interreligioses, de grops armats e de bandas de delinquents.
 
Al delà, l’ÒNU e l’Union Africana denóncian que lo president centreafrican negòcia amb lo cap rebèl ogandés, Joseph Kony, conegut coma “senhor de la guèrra” e establit dins aquel país, per que quite d’èsser clandestin.
 
Fabius expliquèt qu’après la primièra resolucion de l’ÒNU per sosténer una operacion de fòrças africanas e francesas, n’espèra una autra “al començament del mes que ven”.