Un òme, d’aperaquí 40 ans, tuèt son filh de quatre ans dins la nuèch de dimenge a diluns a Tolosa, en lo projectant qualques còps contra lo sòl e contra lo trepador, çò a indicat als mèdias lo procuraire Michel Valet.
 
Dos testimònis l’aurián vist lançar lo drollet un primièr còp d’un pargatge en tresplomb, tocant son immòble de Montaudran, un quartièr residencial del sud-èst de Tolosa. Puèi, anèt prene l’enfant en contrabàs e lo projectèt “mai d’un còp contra lo sòl, puèi mai d’un còp contra un trepador”, çò diguèt lo magistrat.
 
Segon l’autopsia, que l’a raportada lo procuraire, lo dròlle moriguèt d’un “fracàs cranian”.
 
Lo magistrat a pas res dich a prepaus de la rason d’aquel orrible crime. Tot çò que se sap es que los parents de la victima vivon separats. Lo crime foguèt precedit per una denóncia de la maire de l’enfant assassinat contra lo paire, que l’acusava de li aver mossegada la gauta dissabte, al moment qu’el li tornava lo dròlle en gàrdia per la dimenjada.