Lo blòc conservator CDU-CSU que lo mena la cancelièra Angela Merkel, amb los socialdemocratas de l’SPD, arribèron ièr de matin a un acòrdi per governar Alemanha en fasent una nòva granda coalicion. Après mai d’un mes de reünions, en seguida de la victòria incontestabla de Merkel a las darrièras eleccions, los dos grands blòcs parlamentaris alemands an capitat l’acòrdi.
 
Lo pache compren un melhorament de las pensions e doas questions que l’SPD considerava determinantas: un salari minimal interprofessional de 8,5 èuros per ora e que se fixarà per lei en 2015, e mai un engatjament per permetre la dobla nacionalitat. L’acòrdi artura tanben tot aument immediat dels impòstes.
 
Los 475 000 militants de l’SPD deuràn ratificar l’acòrdi en una consulta, que se poiriá far lo 14 de decembre. Alavetz, Merkel poiriá èsser nomenada presidenta lo 17 de decembre amb lo vòte favorable de 504 deputats dels 631 que i a dins lo parlament alemand.