L'operator tolosenc de transpòrts publics vòu tornar pensar a la gratuitat deus servicis per los ancians e los caumaires, tròp pesuga dens lo balanç financèir de l'enterpresa.
Segon La Dépêche, l'operator tolosenc de transpòrts publics exprimirà (dens un rapòrt d'activitat a paréisher a la debuta de junh) dobtes quand a la permanéncia de la gratuitat per cèrtas classas d'usatgèirs. Dempuish 1972, ancians com caumaires pòden beneficiar d'aqueth avantatge, shens nada condicion. Per la crampa regionala deus comptes, 34% deus viatjaires ne paguèren pas lo tiquet en 2010, e 41% gaudivan d'una reduccion.
Aquera remesa en question interven dens un contèxte de crisi financèira mondiala, que pertoca tanben l'enterpresa tolosenca. Fin 2010, la deuta de Tisséo pujava a 1,4 miliard d'euros. Pr'amor d'aquesta cifra, los avantatges aus viatjaires son contestats peus directors e mantun observadors. Mès son contestats tanben l'importància deus frais de mission constatada dens aqueth rapòrt a paréisher. Desplaçaments, repaishs e nuits d'ostalaria aténhen de hèit una valor importanta.
Mès delà lo contèxte de crisi financèira, l'existéncia de mesuras d'avantatges per classas definidas pòt tanben estar saludada. Ancians com caumaires an besunh de transpòrts publics, e aquera gratuitat aquesida dempuish detzenas d'annadas, es uèi-lo-dia considerada com una avançada sociala. Tornar sus aqueth dret aus transpòrts gratis seré dar rason a la financia, e acceptar que dinèirs e interests monetaris priman sus la vita umana. Au conselh sendicau de Tisséo, a la debuta de junh, los arguments diurén pas mancar de s'opausar sus aqueth tèma.
Pèir-Joan Masdiset
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Escotatz-me aqueleis aganits de la finançalha ! Fau nacionalizar los transpòrts en comun, coma servici public. Se transpòrta pas gents per lor tirar moneda, mas perque lor fa besonh caminar per leis ciutats e pertot.
Son endeutats per investir, e investisson per nos tirar mai moneda ! E jos aqueu putanhièr de pretèxte de farlabica, nos pretendon tirar mai moneda encara de tira. Tartarrassa ni vautor non sentisson carn pudent tanplan coma aquesta engènci de financièrs socio-cancerigènis !
Òc-ben, es aquò !! LO deutE es plan de 1,4 miliard d'euros. O ai legit tanben dins un autre jornal.
Calriá almens condicionar la gratuitat o una reduccion en considerar lo nivèl de revengut. Es pas normal qu'un milionari aja pas de pagar son tiquet de metro jos lo simple pretèxte qu'a mai de 65 ans. La deuta es plan de 1.4 miliards d'euro, mas, se m'engani pas, aquò es degut sustot a l'investissament (òbras per la construccion deu metro e deu tram, etc).
1,4 miliard d'euros de deuta ? Sètz segurs d'aquela chifra ? S'es verai, es un engolidor...
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari