Băsescu admet qu’“encara es pas lo moment”. Lo govèrn romanés rebuta las paraulas del president e l’executiu moldau indica que sa prioritat es l’accès a l’UE. Moldàvia ven de signar un acòrdi d’associacion amb Brussèlas. De quatre parts tres dels romaneses son en favor de l’unificacion, segon un sondatge.

Lo president romanés, Traian Băsescu, a levat una bona esposcada tant dins son país coma en la vesina Moldàvia en explicar quin a d’èsser lo grand objectiu venent de Romania, segon el. Per Băsescu, après aver aconseguit los dos primièrs grands objectius que seguissián la casuda del comunisme (l’intrada dins l’OTAN e l’integracion dins l’UE), l’estapa venenta per Romania es son unificacion amb Moldàvia. Segon Băsescu, Romania dirà de òc a l’union quand en Moldàvia i aja un “corrent unionista” pro fòrt. Lo president romanés, ça que la, a admés qu’ara meteis “encara es pas lo moment”.

Romania e Moldàvia partejan la meteissa lenga oficiala, lo romanés, e una bandièra fòrça similara. Los dos païses foguèron units dins lo periòde d’entreguèrras, après lo qual Moldàvia restèt integrada a l’Union Sovietica. Moldàvia proclamèt son independéncia envèrs l’URSS en 1991, e dempuèi es demorada coma estat sobeiran. Una partida del nacionalisme romanés, pasmens, considèra que Moldàvia fa partida del sieu territòri nacional.
 

Lo govèrn de Romania critica Băsescu

Lo govèrn de Romania es estat un dels primièrs a criticar las paraulas de Băsescu. Lo primièr ministre, Victor Ponta —que manten de relacions marridassas amb Băsescu—, a dich que lo president “a fach pas res” per Moldàvia durant nòu ans e que, amb aquelas declaracions, la soleta causa qu’aconseguís es de far lo jòc del Partit Comunista de la Republica de Moldàvia (PCMR), qu’es contra lo raprochament entre los dos païses e que defend lo mantenement de ligams fòrts entre Moldàvia e Russia.

Lo primièr ministre de Moldàvia, Iurie Leancă, tanben a respondut a Băsescu. Leancă a dich que, ara meteis, l’opcion de son país es l’intrada dins l’Union Europèa. Una intrada que Moldàvia farà, a remarcat Leancă, amb lo sieu estat pròpri.
Moldàvia, precisament, ven de signar un acòrdi d’associacion amb l’UE que la situa pus près de l’intrada. Malgrat aquò, encara an pas iniciat las convèrsas oficialas d’accès, e pr’amor d’aquò la perspectiva de l’intrada moldava dins l’UE se situa encara luènh.

Segon EurActiv, lo jornal digital especialitzat en notícias sus l’UE, los comentaris de Băsescu an pas agradat ges dintre la Comission Europèa. Segon lo jornal, la Comission Europèa entend que de declaracions coma aquela son la darrièra causa que l’UE necessita ara meteis, dins sa politica d’alargament cap a l’èst. E sustot: en tenent en compte las tensions que son a viure en cò del vesin oriental de Moldàvia, Ucraïna, ara que lo govèrn ucraïnian ven de refusar de signar l’acòrdi d’associacion amb Brussèlas e qu’a preferit de se sarrar de Moscòu.
 

En Romania, de quatre parts tres vòlon l’unificacion

Mas sembla que Băsescu a dich quicòm qu’un fum de gents pensan en Romania. Just après sas declaracions, l’Institut Romanés per l’Avaloracion e l’Estrategia (IRES, sigla romanesa) publicava un estudi d’opinion que, segon el, lo 76% dels romaneses son en favor de l’unificacion amb Moldàvia. Lo 63% dels enquestats dison que tenon una “bona opinion” de las paraulas del president e lo 49% considèran que la majoritat dels moldaus vòlon l’unificacion.

Una autra enquèsta facha fa dos ans en Moldàvia nega aquela percepcion. Lo 31% dels moldaus enquestats diguèron qu’èran en favor d’unir lor país a Romania, mentre que lo 59% se i mostrèron opausats.








Aqueste article es adaptat de Nationalia, amb qui Jornalet a un acòrdi de cooperacion.