Drama a Milhau (Larzac). Un òme de 28 ans es estat detengut après tuar una gojata de 14 ans amb quinze còps de cotèl, dissabte de ser. S’agís d’un òme amb “d’antecedents d’espitalizacion psiquiatrica”, segon çò qu’explicava als mèdias lo procuraire de la Republica, Yves Delpérier. “Son comportament es per ara totalament incomprensible. Teniá de prepauses incoerents al moment dels faches e ne ten encara en gàrdia a vista”, çò apondèt Delpérier qu’a demandat una expertesa psiquiatrica.
 
La victima, que son assassin la coneissiá pas, deviá passar la nuèch en cò d’una amiga. Los parents de l’amiga, qu’a l’ora dels faches èran pas a l’ostal, logavan a l’agressor un apartament a l’estatge de dessús. Dissabte, a 23h00, l’òme piquèt a la pòrta de l’apartament. Las doas gojatas dobriguèron. En seguida l’agressor garcèt un quinzenat de còps de cotèl a una d’elas. Segon d’informacions de France 3, l’assassin aviá prèviament lançat l’aparelh de television per la fenèstra de son apartament.
 
L’amiga de la victima, que coneissiá l’agressor, capitèt de fugir e aguèt quitament lo temps d’alertar los secorses. Los pompièrs capitèron pas a reanimar la victima, que moriguèt dins l’apartament. De son costat, la brigada anticriminalitat (BAC) de Milhau arrestèt l’agressor davant l’apartament, per carrièra, en preséncia de l’amiga.
 
Una informacion judiciària serà dobèrta uèi pel ministèri public de Montpelhièr, que s’encargarà de seguir l’afar.