L’escòla taurina de Pomarés (Shalòssa) qu’organiza uei la soa serada annau de promocion hens l'arena d’aquera vila. Com tot an, que i seràn presents petitons deu "projècte gascon". Aqueth projècte, qu’ac cau raperar, que consisteish a coplar hens las escòlas primàrias l’ensenhament deu gascon e la sensibilizacion a la corsa landesa. Tot an, mei e mei classas que s’obreishen ad aqueth projècte, adara que son mei de shishanta per totas las Lanas. L’escòla taurina, era, que forman joens a la practica de la corsa landesa, que seràn los escartaires e sautaires de doman.
A 19h30 que s’obrirà l’expausicion deus escolans deu projècte gascon a la sala Andrèu Garbay (au ras de l' arena).
A 21h que començarà la presentacion de l’escòla taurina.
En prumèra partida, los petitons deu projècte gascon que haràn ua demonstracion devath la direccion deu "Manu" (lo famós sautaire Emmanuel Lataste, immortalizat per la non-mensh famosa cançon compausada peus escolans de la classa de GS-CP-CE1 de Na Duhalde-Battu a Caunelha. Com lo Jornalet a tanben ua vocacion culturau, non poish pas resistir de vse’n balhar la letra. Ne'vs serà pas complicat d'endevinar l’aire.*
En dusau partida, los escolans de l’Escòla Taurina que s’aucuparàn de sèt vacas d’escartar e de duas vacas de sautar.
Los escolans que son Jean Aiguillon, Kévin Bareille, Julien Broca, Yann Cabe, Baptiste Cisse, Romain Clave, Cédric Duvignau, Clément Laguian, Louis Navarro, Johnny Valdes, Kenji Valdes.
Las ganaderias que son Dargelos e Deyris. La musica que serà interpretada per l’ Armonia de Pomarés, com a l’acostumada. E l’entrada que serà a gratis.
Gerard Loison
_____
*De cap tà l’escalòt:
Sèi un país e ua corsa
E ua corsa, e ua corsa
Que l’aperam Corsa landesa
Corsa landesa, Corsa landesa
Arrepic :
Haut Manu que vas sautar,
que vas sautar au dessús de las vacas
Haut Manu que vas sautar, que vas sautar,
l’escalòt vas cercar.
Dens ua arena que i a un sautaire
Que i a un sautaire, que i a un sautaire
Qu’ei lo famós Manu Lataste
Manu Lataste, Manu Lataste.
Ar/
Qu’ei tot vestit de roi e blanc
De roi e blanc, de roi e blanc
Qu’a los dus pès dens un berret
Dens un berret, dens un berret
Ar/
Cap a ua vaca qui pren l’aviada
Qui pren l’aviada, qui pren l’aviada
tau un ausèth Manu s’envola
Manu s’envola, Manu s’envola
Haut Manu qu’as plan sautat,
qu’as plan sautat au dessús de las vacas
Haut Manu qu’as plan sautat, qu’as plan sautat,
l’escalòt qu’as guanhat!
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari