Lo cònsol de Biàrritz (Bas Ador), Didier Borotra, del Modèm, foguèt mes en gàrdia a vista ièr dimars, a 8h30 del matin, pr’amor de l’afar de las 3600 multas anulladas per la municipalitat entre març de 2009 e setembre de 2010. Lo director de la polícia municipala de la vila biarròta èra estat ja mes en examen lo 3 de decembre passat per aquel meteis afar.
 
Lo ministèri public de Baiona dobriguèt en abril de 2012 una informacion judiciària per “destruccion, sostraccion o desviament de fonzes publics o pèças, avent luòc per persona depositària de l’autoritat publica o per un de sos subordenats”. Al total, 10% de las contravencions foguèron escafadas, çò que fa que la vila a pas encaissat 70 000 èuros, segon d’informacions de Sud-Ouest.
 
Borotra aviá refusat en partida aquelas acusacions e quitament contestat lo montant de 70 000 èuros, e tanben justifiquèt las multas anulladas a de personas andicapadas, als vièlhs, a de comerçants, d’infirmièras e de mètges. Senhalèt tanben de disfoncionaments dins la comuna.
 
De son costat, lo sindicat de defensa dels policièrs municipals anoncièt en junh una denóncia amb constitucion de partida civila, que visava un cònsol “que se crei en dessús de las leis”.
 
Borotra es cònsol de Biàrritz dempuèi 1991 pel Modèm, e a ja anonciat que serà pas candidat a un quatren mandat.