Las multitudinàrias funeralhas de Nelson Mandela favorizèron un imatge istoric, la saludacion entre lo president dels USA, Barack Obama, e lo president de Cuba, Raúl Castro, que se toquèron las mans. Sembla que la situacion èra imprevista per Obama, que pogèt los escalièrs de l’estadi fins al luòc qu’òm li aviá assignat e lo primièr personatge que i rescontrèt èra Castro. Escambièron brèvament qualques mots, e après Obama saludèt la presidenta de Brasil, Dilma Roussef.
 
Sud-Africa comencèt ièr una setmana de dòl nacional per la mòrt de Nelson Mandela. Se farà d’actes commemoratius fins a dimenge e, de mai, totes lo qu’o desiren li poiràn exprimir lors messatges d’adieus per mejan dels libres de dòl que i a per tot lo país e dins las ambaissadas de tot lo Mond.
 
Lo grand acte public de ièr a l’estadi Soccer City de Johannesburg serviguèt per que totes los qu’o volguèron poguèsson far lors adieus a Mandela. Es l’estadi ont el faguèt sa darrièra aparicion publica en 2010, e participèron un setantenat de caps d’estat e de govèrn.
 
Uèi s’installarà la capèla ardenta. La despuèlha de Mandela ara deu percórrer lo sector entre l’Espital Militar e lo complèxe Union Buildings, en un trajècte que totes los que voldràn i poiràn participar per far lo “gàrdia d’onor”.
 
Dissabte menaràn lo còrs de Mandela a Pretòria, ont lo Congrès Nacional African li dirà sos darrièrs adieus e, en seguida, a la region del Cap Occidental. Ailà una gàrdia d’onor militara recebrà lo còrs de Mandela e lo menarà fins a l’aeropòrt de Mthatha, ont serà transportat dins un carri d’artilhariá e una carròssa fins en cò sieu, al vilatge de Qunu. Après una ceremònia tradicionala de la populacion thembu, Mandela serà enterrat. Se complirà aital son desir de repausar près de sa familha.
 
Fin finala, dimenge, los actes commemoratius s’acabaràn amb de funeralhas d’estat a Qunu. I assistiràn lo president, Jacob Zuma, los autres membres del govèrn e los autres caps d’estat e de govèrn de divèrses païses.