“Tres mila milas nauticas, entre un mes e mièg e tres meses, e pas qu’un enjòc”. Es aital que se fa promocion del dur Talisker Whisky Atlantic Challenge, una traversada de l’Ocean Atlantic que se deu far en vogant. Dempuèi mai d’una setmana, dètz e sèt esquipas formadas mai que mai per doas personas caduna vògan sens relambi, al mitan de l’ocean, sus de barcas de sèt mètres sens cap de motor ni de vela. E sens res per manjar: cada esquipa pòrta solament una maquina per dessalar l’aiga e d’aparelhs per pescar.
 
Sus aqueste sit se pòt seguir la posicion de totas las barcas participantas, que partiguèron lo 4 de decembre de San Sebastián de la Gomera, a las Illas Canàrias, e se prevei qu’arribaràn dins qualques setmanas a Nelson, a l’illa caribenca d’Antigua.
 
La darrièra edicion, de 2011, la ganhèron los angleses Toby Iles e Nick Moore, après quaranta jorns e nòu oras a remar sens relambi.