Lo primièr ministre Jean-Marc Ayrault a anonciat divendres, dempuèi Roazhon en Bretanha, qu’en abril que ven, lo govèrn francés presentarà un projècte de descentralizacion de l’estat inclusent, entre divèrsas mesuras, de donar un marge de manòbra legislativa a las regions (actualament sola Corsega n’a) e mai de ratificar la Carta Europèa de las Lengas Regionalas o Minoritàrias. L’estat reagís ansin al movement breton dels bonets roges qu’a anonciat la convocacion d’un parlament breton amb d’estats generals al mes de febrièr. La ratificacion de la Carta Europèa de las Lengas Regionalas o Minoritàrias obligariá de reformar la constitucion francesa.
 
En un gèst fòrça inabitual, Jean-Marc Ayrault a dich qualques frasas en breton abans de signar lo dich Pache per lo Futur de Bretanha. E mai s’a pas esclarzit fòrça lo contengut de la reforma constitucionala, si qu’a dich que las competéncias de la cultura deurián èsser dins las regions amb lenga pròpria.
 
L’anonci d’Ayrault contrasta amb las darrièras posicions del president François Hollande e del ministre de l’interior Manuel Valls, que se mostravan eles desfavorables a una reconeissença de las lengas minorizadas.
 
Segon d’informacions de Le Monde, lo grop PS de l’Assemblada dicha Nacionala poiriá iniciar un debat sus una lei constitucionala tre genièr de 2014.
 
En lo cas d’Occitània, aquesta reforma pòt pausar la question de saber cossí coordenar las nòu regions oficialas que cobrisson la lenga d’òc (Peitau-Charantas, Centre, Lemosin, Auvèrnhe, Ròse-Alps, Provença, Lengadòc-Rosselhon, Miègjorn-Pirenèus, Aquitània).