Après 9 jorns de funeralhas, enterrèron ièr lo còrs de Nelson Mandela a Qunu, son vilatge natal, on l’èx-presonièr e president de Sud-Africa visquèt qualques ans après sa retirada. Mandela èra membre d’una de las familhas nòblas de la nacion xhosa, e segon aquela tradicion an facha la ceremònia.
 
D’en primièr se debanèron las funeralhas d’estat, pendent mai de doas oras, qu’amassèron 4500 personas. I aviá sa familha, de mandataris de divèrses païses e l’archevesque Desmon Tutu, amic de Mandela qu’es fòrça critic amb lo govèrn actual, qu’acusa d’aver instrumentalizat Mandela. Tutu aviá anonciat que i anariá pas, mas fin finala i anèt a la demanda de la familha de Mandela. Zuma faguèt un discors ont sollicitèt sos compatriòtas per “portar dins lor vida lo legat” de Mandela.
 
Après aquel acte oficial, Mandela foguèt enterrat en una ceremònia privada, en seguissent la tradicion xhosa, al meteis endrech ont son enterrats tres de sos enfants.
 
Solament participèron la familha e de membres de son clan. Segon la tradicion xhosa, los qu’acompanhan lo cadavre devon parlar amb el en li explicant lo viatge que va començar. Li descrivon lo luòc ont acabarà e li parlan dels sieus aujòls per que los pòsca reconéisser quand los rescontrarà. Lo taüc es cobèrt puèi amb la pèl d’un laupard e se sacrifica un animal coma ofrenda pels que delà espèran l’arribada del defunt, qu’es enrotlat amb la pèl d’aquel animal. Al costat del còrs meton tanben qualques unes dels objèctes que lo mòrt mai aimava. Fin finala, l’òme mai vièlh del vilatge explica als esperits qual es e çò qu’a fach la persona que son a enterrar.
 
Amb aquela ceremònia privada, se finiguèt una setmana d’adieus a l’òme que capitèt de n’acabar amb l’apartheid en Sud-Africa e que menèt la democracia pluralista al país.