Lo deputat Martin Candinas ven de crear per lo primièr còp un grop parlamentari romanch dins l’Assemblada Federala de Soïssa. Segon çò qu’explica la Radiotelevision Soïssa Romancha, Candinas vòl que lo grop servisca a refortir la preséncia de la lenga en Soïssa, que malgrat que siá oficiala dins las institucions federalas dempuèi 1996, abitualament a mens de preséncia que las autras tres lengas oficialas (alemand, francés e italian). Aital, Candinas vòl que lo grop servisca a far prene consciéncia als parlamentaris soïsses que lo romanch “es quicòm mai que lo folclòre”.
 
Lo romanch se parla sustot als Grisons. Es lenga oficiala d’aquel canton amb l’alemand e l’italian, e s’ensenha dins las escòlas. La pression de l’alemand li a fach pèrdre de parlants e de territòris long dels sègles. Dins lo recensament de l’an 2000, 60 000 soïsses diguèron qu’emplegavan la lenga abitualament, dont 35 000 declarèron que lo romanch èra la lenga que parlavan melhor.
 
 
 
 
 
Aqueste article es adaptat de Nationalia, amb qui Jornalet a un acòrdi de cooperacion.