L’aligòt es una especialitat gastronomica d’Aubrac estenduda per Roergue, Auvèrnhe e Lemosin. S’agís d’un plat fòrt, fach sus una basa de purèa de patanas e de crèma, amb de formatge de Cantal nomenat toma, que se mescla pendent fòrça temps amb un pal de fusta per n’obténer una textura espessa; e s’i pòt apondre de burre, d’alh…
 
Normalament s’acompanha amb de salsissas grasilhadas.
 
D’unes dison que lo nom vendriá del mot latin aliquot que vòl dire “qualques”, e a sas originas en un plat que servissián los monges d’Aubrac als pelegrins que traversavan la Via Podiensis del Puèi de Velai a Compostèla, e que teniá de pan en luòc de las patanas. Al jorn d’uèi es un plat de fèsta o dels mercats de Nadal.
 
 
Ingredients (per 4 personas):
 
1 kg de patanas
400 g de formatge de toma de Cantal
200 g de crèma de lach
2 cabòças d’alh
de sal
de pebre negre
 
 
Preparacion
 
Pelatz las patanas, talhatz-las en tròces grands e fasètz-las còire dins l’aiga bulhenta salada, amb los alhs pelats, pendent aperaquí vint minutas, o fins que sián cuèchas. Mentretant, podètz talhar lo formatge en lescas finas. Escolatz las patanas e fasètz-ne purèa, en apondent un pauc d’aiga de cuècha se cal. Apondètz la crèma de lach e mesclatz ben. Quand serà una pasta omogenèa, tant que serà cauda apondètz lo formatge e tafuratz energicament amb un culhièr o un pal de fusta. La textura deu èsser fina e, se levatz lo pal del culhièr parallèl a la taula, deu tombar una capa fòrça fina e elastica de la purèa. Apondètz de sal e de pebre a vista de nas e apondètz un alh escrachat per i donar mai de gost.
 
 
 
 
_____

Per participar al concors de recèptas de Jornalet cal mandar per e-mail una recèpta acompanhada d’un imatge del plat per nos far lega. Lo ganhant aurà coma prèmi un lòt de produches Macarèl.